بلوچستان کے ضلع مستونگ کے علاقے دشت سے نامعلوم مسلح افراد نے بدھ کی شام نو مزدوروں کو ان کی پک اپ گاڑی سمیت اغوا کر لیا۔ مقامی میڈیا کے مطابق لیویز حکام نے واقعے کی تصدیق کی ہے۔
ذرائع کے مطابق مزدور تحصیل دشت کے علاقے سیاہ پیش میں زیر تعمیر عمارت پر کام کر رہے تھے اور شام کے وقت کام مکمل کر کے واپس جا رہے تھے کہ راستے میں مسلح افراد نے انہیں روک لیا۔
حملہ آوروں نے چند فاصلے پر مقامی ڈرائیور کو رہا کر دیا لیکن نو مزدوروں اور ان کی پک اپ گاڑی کو اپنے ساتھ لے گئے۔ اغوا ہونے والے مزدوروں کا تعلق پنجاب اور سندھ کے مختلف اضلاع سے بتایا جاتا ہے۔
واقعے کے بعد لیویز فورس اور دیگر قانون نافذ کرنے والے اداروں نے علاقے کو گھیرے میں لے کر قریبی پہاڑی علاقوں اور دیہات میں سرچ آپریشن شروع کر دیا۔
ابھی تک کسی گروہ نے اس واقعے کی ذمہ داری قبول نہیں کی، جبکہ حکام اغوا کی وجوہات جاننے کے لیے تحقیقات کر رہے ہیں۔
