فرانسیسی حکام نے لوور میوزیم میں ہونے والی قیمتی زیورات کی بڑی چوری کے الزام میں دو مشتبہ افراد کو گرفتار کر لیا ہے، جن میں سے ایک ملک سے فرار ہونے ہی والا تھا۔ پیرس کے پراسیکیوٹر کے مطابق، گرفتاری ہفتہ کی شام عمل میں آئی۔
فرانسیسی اخبار لوپاریزیاں کے مطابق، دونوں ملزمان کی عمریں 30 برس کے قریب ہیں اور وہ دارالحکومت کے نواحی علاقے سین سین ڈینس کے رہائشی ہیں۔
رپورٹ میں کہا گیا کہ ایک ملزم چارلس ڈی گال ایئرپورٹ سے الجزائر جانے کی تیاری کر رہا تھا جب اسے حراست میں لیا گیا۔
اب تک یہ واضح نہیں ہو سکا کہ چوری شدہ زیورات میں سے کوئی بازیاب ہوا ہے یا نہیں۔
پراسیکیوٹر کی برہمی، معلومات کے افشا ہونے پر افسوس
پیرس کی پراسیکیوٹر لور بیکو نے مشتبہ افراد کی تعداد یا تفصیلات ظاہر کرنے سے گریز کیا، تاہم انہوں نے میڈیا میں گرفتاری کی اطلاع کے افشا ہونے پر شدید افسوس کا اظہار کیا۔
انہوں نے کہا: “اس قسم کے انکشافات سے سو سے زائد تفتیش کاروں کی کوششوں کو نقصان پہنچ سکتا ہے جو چوری شدہ زیورات کی برآمدگی اور تمام مجرموں کی گرفتاری میں مصروف ہیں۔ ابھی کسی مخصوص تفصیل کا وقت نہیں آیا۔”
وزیر داخلہ کی تحقیقاتی ٹیم کو مبارکباد
فرانسیسی وزیر داخلہ لوراں نیونیز نے ایک ہفتہ بعد عوامی دباؤ کے باوجود محققین کو سوشل میڈیا پر مبارکباد دی، مگر مزید تفصیلات فراہم نہیں کیں۔
جرأت مندانہ ڈکیتی نے فرانس کو ہلا دیا
انیس اکتوبر کو چار نقاب پوش چوروں نے لوور میوزیم سے آٹھ قیمتی نوادرات چرا لیے جن کی مالیت تقریباً 102 ملین ڈالر بتائی جا رہی ہے۔
چوروں نے کرین کی مدد سے عمارت کی اوپری منزل کی کھڑکی توڑی اور موٹرسائیکلوں پر فرار ہوگئے۔
اس واقعے نے فرانس بھر میں شدید ردعمل پیدا کیا، جہاں اسے “قومی شرمندگی” قرار دیا جا رہا ہے۔
چوری شدہ شاہی زیورات
چوری ہونے والے نوادرات میں انیسویں صدی کی ملکہ میری امیلی اور ہورٹنس کے زیورات شامل تھے، جبکہ نپولین سوم کی اہلیہ ایمپریس یوجینی کا تاج میوزیم کے باہر ٹوٹا ہوا ملا۔
چور فرار کے دوران سونا، زمرد اور ہیرے سے مزین یہ تاج گرنے کی صورت میں چھوڑ گئے۔
لوور کی تاریخی اہمیت
بارہویں صدی کے آخر میں تعمیر ہونے والا لوور پیلس طویل عرصے تک فرانسیسی بادشاہوں کی رہائش گاہ رہا۔
فرانسیسی انقلاب کے بعد 1793 میں اسے عوامی میوزیم میں تبدیل کر دیا گیا، جہاں آج دنیا کے مشہور شاہکار مونالیزا اور وینس ڈی مائلو رکھے گئے ہیں۔
گزشتہ سال میوزیم کو 87 لاکھ سے زائد افراد نے دیکھا۔
