بیجنگ: چین کی مینڈ اسپیس ایجنسی (سی ایم ایس اے) نے اعلان کیا ہے کہ دو پاکستانی خلا باز چینی خلابازوں کے ساتھ مشترکہ تربیت حاصل کریں گے، جن میں سے ایک کو مختصر مدت کے خلائی مشن میں بطور "پے لوڈ اسپیشلسٹ” منتخب کیا جائے گا۔
سی ایم ایس اے کے ترجمان ژانگ جنگ بو کے مطابق، پاکستانی خلا بازوں کے انتخاب کا عمل باضابطہ طور پر شروع ہو چکا ہے۔ یہ اقدام چین اور پاکستان کے درمیان فروری 2025 میں ہونے والے تعاون کے معاہدے کے تحت کیا گیا ہے۔
ترجمان نے بتایا کہ انتخابی عمل چینی خلابازوں کے طریقہ کار کے مطابق تین مراحل پر مشتمل ہے — ابتدائی مرحلہ، دوسرا مرحلہ، اور حتمی انتخاب۔ ابتدائی مرحلہ پاکستان میں جاری ہے جبکہ دوسرا اور آخری مرحلہ چین میں منعقد ہوگا۔
ژانگ کے مطابق دوسرے مرحلے کی تیاریاں جاری ہیں، جن میں تربیتی پروگرام، تدریسی مواد اور آلات کی تیاری کے ساتھ ساتھ تربیت کے دوران سہولیات کا انتظام شامل ہے۔
حتمی مرحلے کے بعد دو پاکستانی خلا باز چینی خلابازوں کے ساتھ باقاعدہ تربیت حاصل کریں گے۔ ان میں سے ایک خلا باز کو مختصر مدت کے خلائی مشن کے لیے منتخب کیا جائے گا، جو پاکستان کی جانب سے سائنسی تجربات انجام دے گا اور خلائی عملے کے روزمرہ کے فرائض بھی سرانجام دے گا۔
ژانگ جنگ بو نے کہا کہ چین کا مینڈ اسپیس پروگرام پُرامن استعمال، مساوات، باہمی فائدے اور مشترکہ ترقی کے اصولوں پر مبنی ہے۔ انہوں نے کہا کہ چین دنیا بھر کے خلابازوں کو اپنے خلائی اسٹیشن کے مشنز میں شامل ہونے کی دعوت دیتا ہے تاکہ عالمی تعاون اور سائنسی ترقی کو فروغ دیا جا سکے۔
