پاکستان انٹرنیشنل ایئرلائنز (پی آئی اے) نے جمعرات کے روز سوسائٹی آف ایئرکرافٹ انجینئرز آف پاکستان (SAEP) کے صدر عبداللہ جدون اور سیکرٹری جنرل اویس جدون کو ملازمت سے برطرف کردیا۔ یہ اقدام ادارے اور انجینئرز کے درمیان جاری تنازع کے دوران سامنے آیا ہے۔
پی آئی اے کے ترجمان عبداللہ حفیظ نے تصدیق کی کہ دونوں افسران کے خلاف محکمانہ انکوائری مکمل ہونے کے بعد برطرفی کے احکامات جاری کیے گئے۔ نوٹسز کے مطابق، دونوں پر غیر مجاز پریس کانفرنس کرنے، خفیہ معلومات افشا کرنے اور انکوائری میں پیش نہ ہونے کے الزامات ثابت ہوئے۔
نوٹس میں کہا گیا کہ دونوں عہدیداران کو دفاع کا موقع دیا گیا لیکن انہوں نے پیشی سے گریز کیا، جس پر انتظامیہ نے شواہد کی بنیاد پر انہیں قصوروار قرار دیتے ہوئے فوری طور پر ملازمت سے برطرف کردیا۔
یہ اقدام اس وقت کیا گیا جب پی آئی اے انجینئرز گزشتہ ڈھائی ماہ سے تنخواہوں میں اضافے اور دیگر مطالبات کے لیے احتجاج کررہے ہیں، اور جہازوں کے کلیئرنس سرٹیفکیٹس جاری نہ کرنے کے باعث پروازوں میں تاخیر کا سامنا ہے۔
پی آئی اے کا مؤقف ہے کہ انجینئرز کا احتجاج غیر قانونی ہڑتال کے زمرے میں آتا ہے کیونکہ ادارے پر لازمی خدمات ایکٹ نافذ ہے۔ تاہم، ایس اے ای پی کا کہنا ہے کہ انجینئرز اپنی ڈیوٹی پر موجود ہیں اور صرف ان جہازوں کو کلیئر کر رہے ہیں جو مکمل طور پر محفوظ ہیں۔
اویس جدون نے کہا کہ انجینئرز پر دباؤ ڈالا جارہا ہے کہ وہ غیر محفوظ طیاروں کو کلیئر کریں، لیکن وہ مسافروں کی جانوں کو خطرے میں نہیں ڈال سکتے۔ انہوں نے واضح کیا کہ انتظامیہ نے مذاکرات کے لیے نہیں بلکہ ذاتی انکوائری کے لیے بلایا تھا۔
پی آئی اے نے الزام عائد کیا ہے کہ انجینئرز کا احتجاج ادارے کی نجکاری کے عمل کو سبوتاژ کرنے کی کوشش ہے۔ ترجمان کے مطابق، متبادل انتظامات کے ذریعے پروازوں کو جزوی طور پر بحال کر دیا گیا ہے۔
پیر کی شب تین بڑے ہوائی اڈوں پر درجنوں پروازیں متاثر ہوئیں اور سیکڑوں مسافر پھنس گئے، جب انجینئرز کے احتجاج کے باعث کم از کم چھ پروازیں تاخیر کا شکار ہوئیں۔
