اسلام آباد (ایم این این); پاکستان میں ڈنمارک کی نئی سفیر، مایا ڈیروس مورٹن سن نے اپنے عہدے کا چارج سنبھالنے کے بعد اسلام آباد میں اپنی پہلی سرکاری تقریب منعقد کی، جس میں موسیقی اور ثقافتی تبادلے کی ایک خوبصورت شام پیش کی گئی۔ اس پروگرام کا انعقاد سفیر کی رہائش گاہ پر کیا گیا، جہاں ڈنمارک۔پاکستان میوزیکل ایکسچینج ٹور کے تحت خصوصی پرفارمنس پیش کی گئی۔
تقریب میں حکومتی نمائندوں، ترقیاتی اداروں، نجی شعبے اور تجارتی حلقوں، آرٹس و ثقافت سے وابستہ افراد اور سفارتی برادری کے ارکان نے شرکت کی۔ یہ تقریب اس موقع کے صرف تین دن بعد ہوئی جب سفیر نے صدرِ پاکستان کو اپنی اسناد پیش کیں۔
شرکاء نے ڈنمارک کے فنکاروں، ہنزہ کے لیف لارسن میوزک سینٹر کے نوجوان موسیقاروں اور لاہور کے قوال گروپ سوال کی مشترکہ موسیقی سے لطف اٹھایا۔ مختلف موسیقی روایات کے امتزاج نے دونوں ممالک کے درمیان ثقافتی تعاون کی تخلیقی صلاحیت کو اجاگر کیا۔
ڈنمارک کی ترجیحات میں ماحولیاتی اقدامات، سبز معیشت کی طرف منتقلی، پائیدار انفراسٹرکچر اور دوطرفہ تجارت کو فروغ دینا شامل ہے، تاہم میوزیکل ایکسچینج ٹور جیسے ثقافتی پروگرام دونوں ممالک کے درمیان 75 سالہ عوامی تعلقات کو مزید مضبوط بنانے کی کوشش کا حصہ ہیں۔
ڈنمارک کے سفارتخانے نے اس خصوصی شام میں شرکت پر تمام مہمانوں کا شکریہ ادا کرتے ہوئے اسے سفیر مورٹن سن کے پاکستان میں سفارتی سفر کے ایک مثبت آغاز قرار دیا۔
