فیصل آباد (ایم این این); گورنمنٹ کالج یونیورسٹی فیصل آباد کے وائس چانسلر پروفیسر ڈاکٹر رؤفِ اعظم چین کے سرکاری دورے پر ہیں، جہاں وہ ہواژونگ ایگریکلچرل یونیورسٹی ووہان کی دعوت پر پانچویں بیلٹ اینڈ روڈ چین۔پاکستان ایگریکلچر فورم میں شریک ہیں۔
افتتاحی تقریب سے ہواژونگ ایگریکلچرل یونیورسٹی کے صدر پروفیسر یان جیان بُنگ نے خطاب کرتے ہوئے بیلٹ اینڈ روڈ کے تحت تعلیمی تعاون کو مزید مضبوط بنانے کی اہمیت پر زور دیا۔ چین میں پاکستان کے سفیر خالد حشمی نے پاک۔چین دوستی کو سراہا اور مشترکہ تحقیقی اقدامات پر یونیورسٹی کی کاوشوں کی تعریف کی۔
اپنے خطاب میں پروفیسر ڈاکٹر رؤفِ اعظم نے جی سی یو ایف کی بین الاقوامی تعاون کی پالیسی پر روشنی ڈالی اور چینی طلبہ و محققین کو فیصل آباد میں جی سی یو ایف کے ساتھ کام کرنے کی دعوت دی۔ انہوں نے جی سی یو ایف کے اساتذہ اور طلبہ کو ووہان اور چین کی دیگر معروف جامعات میں تحقیقی و تعلیمی سرگرمیوں میں شرکت کی ترغیب بھی دی۔
اپنے دورے کے دوران وائس چانسلر نے چائنز اکیڈمی آف سائنسز کے تحت چلنے والے لوشان بوٹینیکل گارڈن کے ساتھ ایک اہم مفاہمتی یادداشت پر دستخط کیے، جس کا مقصد پاکستان میں پہلا بوٹینیکل گارڈن قائم کرنا ہے جو ماحولیاتی تعلیم اور سائنسی سیاحت کو فروغ دے گا۔
پروفیسر ڈاکٹر رؤفِ اعظم نے ہواژونگ ایگریکلچرل یونیورسٹی کے ساتھ زرعی اور حیاتیاتی علوم میں تعاون بڑھانے کے لیے ایک اور اہم معاہدے پر بھی دستخط کیے۔ معاہدے میں مشترکہ تحقیقی منصوبے، اساتذہ و طلبہ کے تبادلے، مشترکہ نگرانی کا فریم ورک، اور بین الاقوامی تحقیقی فنڈنگ کے لیے مشترکہ درخواستیں شامل ہیں۔
