راولپنڈی ٹریفک پولیس نے شہر بھر میں سیف سٹی کیمروں کو باضابطہ طور پر فعال کر دیا ہے، جس کے ساتھ ہی ٹریفک قوانین کی خلاف ورزیوں پر خودکار ای چالاننگ کا آغاز ہو گیا ہے۔
مجموعی طور پر 359 مقامات پر دو ہزار سے زائد کیمرے نصب کیے گئے ہیں جو موٹر سائیکلوں اور گاڑیوں کی نقل و حرکت کی نگرانی کریں گے۔
سیف سٹی کیمروں کی مدد سے ہیلمٹ نہ پہننے، سیٹ بیلٹ استعمال نہ کرنے اور سگنل توڑنے سمیت دیگر خلاف ورزیوں پر خودکار چالان جاری کیے جائیں گے۔
تصاویر اور کوڈ کے ساتھ تیار ہونے والا ای چالان گاڑی کے مالک کے گھر کے پتے پر بھیجا جائے گا۔
ای چالاننگ سسٹم کو سیف سٹی کمانڈ اینڈ کنٹرول سینٹر کے ساتھ منسلک کر دیا گیا ہے۔
سی ٹی او راولپنڈی فرحان اسلم کے مطابق یہ کیمرے ٹریفک کنٹرول کے ساتھ ساتھ قانون نافذ کرنے والے اداروں کی معاونت بھی کریں گے۔
انہوں نے کہا کہ سیف سٹی نظام سے ٹریفک انتظامات میں مزید بہتری آئے گی جبکہ ٹریفک وارڈنز کی توجہ ٹریفک کی روانی برقرار رکھنے پر زیادہ مرکوز ہو سکے گی۔
ترجمان ٹریفک پولیس راولپنڈی کے مطابق سیف سٹی سسٹم شہر میں ٹریفک کی مسلسل نگرانی میں بھی مددگار ثابت ہوگا۔
