ویب ڈیسک (ایم این این) – روس کے وزیر توانائی سرگئی سیویلیو اسلام آباد پہنچ گئے جہاں وہ روس۔پاکستان دسویں بین الحکومتی کمیشن کے اجلاس میں شریک ہوں گے۔ دورے کے دوران انہوں نے پاکستان نیشنل کونسل آف دی آرٹس میں روسی اور پاکستانی لوک فنکاروں کے مشترکہ کنسرٹ میں بھی شرکت کی۔
وزیر نے روسی صدر ولادی میر پیوٹن کی جانب سے پاکستان کے عوام کیلئے نیک خواہشات اور گرمجوشانہ جذبات کا پیغام پہنچایا، اور یہ امید ظاہر کی کہ دونوں ممالک کی دوستی ہر گزرتے سال کے ساتھ مزید مضبوط ہوگی۔ انہوں نے پاکستان اور روس کے درمیان ثقافتی روابط کے فروغ کی اہمیت پر بھی زور دیا۔
تقریب میں وزارتِ ہنگامی امور کے وہ اہلکار بھی موجود تھے جنہوں نے 2005 کے تباہ کن زلزلے کے بعد امدادی سرگرمیوں میں حصہ لیا تھا۔
