اسلام آباد (ایم این این) – وزیراعظم شہباز شریف نے جمعرات کے روز صدر آصف علی زرداری کو سمری بھجوائی ہے جس میں چیف آف آرمی اسٹاف فیلڈ مارشل عاصم منیر کو پاکستان کے پہلے چیف آف ڈیفنس فورسز (سی ڈی ایف) مقرر کرنے کی سفارش کی گئی ہے۔
27ویں آئینی ترمیم کے تحت تخلیق کیا گیا یہ عہدہ چیئرمین جوائنٹ چیفس آف اسٹاف کمیٹی (سی جے سی ایس سی) کے خاتمے کے بعد وجود میں آیا، جو 27 نومبر کو باضابطہ طور پر ختم ہو چکا ہے۔ نیا سی ڈی ایف عہدہ دوہری ذمہ داریوں پر مشتمل ہوگا کیونکہ اس میں آرمی چیف کا عہدہ بھی برقرار رہے گا۔
وزیراعظم ہاؤس کے جاری کردہ بیان کے مطابق شہباز شریف نے فیلڈ مارشل عاصم منیر کی بطور آرمی چیف اور چیف آف ڈیفنس فورسز تقرری کی منظوری دے دی ہے اور سمری صدر کو ارسال کر دی گئی ہے۔ دونوں عہدوں کے لیے مدتِ ملازمت پانچ برس مقرر کی گئی ہے۔
وزیراعظم نے ایئر چیف مارشل ظہیر احمد بابر سدھو کی مدت ملازمت میں دو سال کی توسیع کی بھی منظوری دی ہے، جو مارچ 2026 میں موجودہ پانچ سالہ مدت پوری ہونے کے بعد نافذ ہوگی۔ ایئر چیف مارشل سدھو مارچ 2021 میں تعینات ہوئے تھے اور 2024 میں انہیں ایک سال کی توسیع ملی تھی۔
متعدد حکام اور تجزیہ کاروں کی توقع تھی کہ سی ڈی ایف کا نوٹیفکیشن 27 نومبر کو سی جے سی ایس سی کے خاتمے کے فوراً بعد جاری ہو جائے گا، لیکن اس میں تاخیر ہوئی۔ وزیر دفاع خواجہ آصف نے اتوار کو کہا تھا کہ نوٹیفکیشن مناسب وقت پر جاری کیا جائے گا اور اس بارے میں قیاس آرائیوں سے گریز کرنا چاہیے۔
اگلے دن وزیر قانون اعظم نذیر تارڑ نے کہا کہ نوٹیفکیشن جلد آجائے گا لیکن فیلڈ مارشل عاصم منیر پہلے ہی ہر لحاظ سے یہ ذمہ داری نبھا رہے ہیں۔ انہوں نے تاخیر کی وجہ وزیراعظم کا بیرون ملک ہونا بتایا اور کہا کہ نوٹیفکیشن جاری کرنا وزارت دفاع کا کام ہے جسے وزیراعظم آفس سے ہم آہنگی کرنا ہوتی ہے۔
آئندہ تقرریاں
گزشتہ ماہ پارلیمنٹ سے منظور کی گئی 27ویں ترمیم کے بعد ملک کے اعلیٰ دفاعی ڈھانچے کی ازسرنو تشکیل کا عمل جاری ہے، لیکن سی ڈی ایف کے نوٹیفکیشن میں تاخیر نے اس منتقلی کو سست کر دیا ہے۔
ابھی زیرِ التواء فیصلہ نیشنل اسٹریٹجک کمانڈ (این ایس سی) کے کمانڈر کی تقرری کا ہے، جو نیا چار ستارہ عہدہ ہوگا اور وہ جوہری اثاثوں کے انتظام کی ذمہ داریاں سنبھالے گا جو پہلے سی جے سی ایس سی کے پاس تھیں۔ حکام کا کہنا ہے کہ یہ تقرری سی ڈی ایف کے نوٹیفکیشن کے بعد ہی ہوگی۔
ترمیم شدہ آرٹیکل 243 کے مطابق این ایس سی کے کمانڈر کی تقرری وزیراعظم کریں گے، جو سی ڈی ایف کی سفارش پر ہوگی۔
اس کے ساتھ ہی نیشنل کمانڈ اتھارٹی ایکٹ میں بھی ترمیم درکار ہے تاکہ نئے ڈھانچے کے مطابق اسے ہم آہنگ کیا جا سکے، خصوصاً اس حوالے سے کہ نئے عہدوں کا رینک ایئر فورس اور نیوی چیفس کے مقابل کس مقام پر ہوگا اور کیا دونوں سروسز کے سربراہان مستقبل میں بھی این سی اے کا حصہ رہیں گے، جب کہ ان کی اسٹریٹجک کمانڈز اب متحدہ این ایس سی کمانڈر کے ماتحت آ جائیں گی۔
