راولپنڈی (ایم این این) – سیکیورٹی فورسز نے بلوچستان کے ضلع قلات میں خفیہ اطِلاعات کی بنیاد پر کیے گئے ایک آپریشن میں 12 دہشت گردوں کو ہلاک کر دیا، فوج کے شعبہ تعلقاتِ عامہ (آئی ایس پی آر) نے اتوار کو بتایا۔
آئی ایس پی آر کے مطابق یہ آپریشن ہفتہ کے روز اُس وقت کیا گیا جب علاقے میں ’’بھارتی پراکسی فتنہُ الہندستان‘‘ سے تعلق رکھنے والے دہشت گردوں کی موجودگی کی اطلاعات موصول ہوئیں۔ ریاستِ پاکستان نے بلوچستان میں سرگرم مختلف گروہوں کو فتنہ الہندستان قرار دے کر بھارت کے مبینہ کردار کو اجاگر کیا ہے۔
بیان میں کہا گیا کہ فورسز نے دہشت گردوں کی پناہ گاہ پر مؤثر کارروائی کی اور شدید فائرنگ کے تبادلے کے بعد 12 ’’بھارت نواز دہشت گردوں‘‘ کو جہنم واصل کر دیا۔ موقع سے بھاری مقدار میں اسلحہ، گولہ بارود اور بارودی مواد بھی برآمد ہوا، جبکہ یہ گروہ علاقے میں کئی تخریبی کارروائیوں میں ملوث تھا۔
آئی ایس پی آر کے مطابق علاقے میں مزید ممکنہ بھارتی سرپرست دہشت گردوں کی تلاش کیلئے کلیئرنس آپریشن جاری ہے۔ بتایا گیا کہ ’’عزمِ استحکام‘‘ کے ویژن کے تحت جاری انسدادِ دہشت گردی مہم پوری رفتار سے جاری رہے گی تاکہ بیرونی حمایت یافتہ دہشت گردی کا مکمل خاتمہ ہو سکے۔
ملک میں دہشت گردی کی کارروائیوں میں اضافہ دیکھنے میں آ رہا ہے، خصوصاً کے پی اور بلوچستان میں، جہاں 2022 میں ٹی ٹی پی کی جانب سے جنگ بندی ختم کیے جانے کے بعد حملوں میں تیزی آئی ہے۔ گزشتہ روز آئی ایس پی آر نے بتایا تھا کہ لکی مروت اور ٹانک میں تین مختلف آئی بی اوز کے دوران 14 دہشت گرد مارے گئے، جبکہ اسی ہفتے شمالی وزیرستان میں بھی دو کارروائیوں میں سات دہشت گرد ہلاک ہوئے۔
صدر اور وزیراعظم کا قلات آپریشن پر خراجِ تحسین
صدر آصف علی زرداری اور وزیراعظم شہباز شریف نے قلات میں کامیاب کارروائی پر سیکیورٹی فورسز کو سراہا۔ صدر نے کہا کہ پاکستان ہر قیمت پر امن کے دشمنوں کو کیفر کردار تک پہنچانے کی پوری صلاحیت رکھتا ہے اور قوم کا عزم فتنہ الہندستان کی ہر سازش کو ناکام بنائے گا۔
وزیراعظم شہباز شریف کا کہنا تھا کہ سیکیورٹی فورسز ’’عزمِ استحکام‘‘ کے تحت دہشت گردی کے خلاف نمایاں کامیابیاں حاصل کر رہی ہیں۔ انہوں نے کہا کہ پوری قوم دہشت گردی کے خلاف متحد ہے اور اس لعنت کا مکمل خاتمہ کرنے کیلئے پُرعزم ہے۔
