اسلام آباد (ایم این این): حکومتِ جاپان، جاپان انٹرنیشنل کوآپریشن ایجنسی (جائیکا) کے ذریعے، اور اقوام متحدہ کے ترقیاتی پروگرام (یو این ڈی پی) نے حکومت خیبر پختونخوا کے اشتراک سے خیبر پختونخوا کے ضم شدہ اضلاع میں مقامی حکمرانی کو مضبوط بنانے اور بنیادی عوامی خدمات تک رسائی بہتر کرنے کے لیے ایک نئے منصوبے کا آغاز کر دیا ہے۔
یہ منصوبہ “خیبر پختونخوا کے ضم شدہ اضلاع میں عوامی خدمات کے انفراسٹرکچر کی ترقی” کے عنوان سے شروع کیا گیا ہے، جس پر یو این ڈی پی کے مرجڈ ایریاز گورننس پروگرام کے تحت عملدرآمد ہوگا۔ اس شراکت داری کو اسلام آباد میں ایک دستخطی تقریب کے ذریعے باضابطہ شکل دی گئی۔
2018 میں خیبر پختونخوا میں انضمام کے بعد ضم شدہ اضلاع ایک اہم عبوری مرحلے سے گزر رہے ہیں، جہاں اختیارات کی نچلی سطح تک منتقلی اور مقامی سطح پر خدمات کی فراہمی کا عمل جاری ہے۔ اگرچہ اس حوالے سے نمایاں پیش رفت ہوئی ہے، تاہم نئے قائم ہونے والے مقامی نظام کو انتظامی صلاحیت، عوامی ردعمل اور بنیادی سہولیات کی فراہمی کے لیے مزید معاونت درکار ہے۔ یہ منصوبہ انہی خلا کو پُر کرنے کے لیے تیار کیا گیا ہے، جس کا مقصد پہلی بار منتخب ہونے والی تحصیل لوکل گورنمنٹس کی ادارہ جاتی صلاحیت کو مضبوط بنانا اور عوام دوست حکمرانی کو فروغ دینا ہے۔
جاپان کی جانب سے 51 کروڑ 80 لاکھ جاپانی ین (تقریباً 35 لاکھ امریکی ڈالر) کی مالی معاونت سے یہ منصوبہ آٹھ ضم شدہ اضلاع کی 19 تحصیل لوکل گورنمنٹس میں چھوٹے پیمانے کے انفراسٹرکچر منصوبوں کے ذریعے بنیادی خدمات کی فراہمی میں مدد دے گا۔ اس منصوبے سے براہِ راست تقریباً 18 ہزار افراد مستفید ہوں گے جبکہ بالواسطہ طور پر لگ بھگ 5 لاکھ افراد تک اس کے فوائد پہنچیں گے۔ مقامی انتظامیہ کے ساتھ مل کر کمیونٹی کی ضروریات کے مطابق منصوبوں کی نشاندہی اور عملدرآمد کیا جائے گا، جس سے ہم آہنگی، جوابدہی اور عوامی شمولیت کو فروغ ملے گا۔
دستخطی تقریب میں وزارتِ اقتصادی امور، حکومتِ خیبر پختونخوا، جاپانی سفارتخانے، جائیکا اور یو این ڈی پی کے اعلیٰ حکام نے شرکت کی، جس سے اس خطے میں بہتر حکمرانی اور عوامی خدمات کی فراہمی کے لیے مشترکہ عزم کا اظہار ہوا۔
اس موقع پر پاکستان میں جاپان کے سفیر اکیماٹسو شوئیچی نے کہا کہ ضم شدہ اضلاع صوبے اور ملک میں پائیدار امن و ترقی کے لیے ایک اہم مگر چیلنجنگ خطہ ہیں۔ ان کے مطابق یہ منصوبہ نہ صرف کمیونٹی انفراسٹرکچر اور خدمات کی بحالی میں مدد دے گا بلکہ شراکتی اور جامع مقامی حکمرانی کو بھی فروغ دے گا۔
جائیکا پاکستان آفس کے سینئر نمائندے ناکاتسو ماساکی نے کہا کہ تحصیل ترقیاتی منصوبوں کی تیاری کے بعد یہ نیا منصوبہ ان منصوبوں پر عملدرآمد اور مقامی آبادی کی ضروریات پوری کرنے میں کلیدی کردار ادا کرے گا اور مقامی حکومتوں و عوام کے درمیان اعتماد کو فروغ دے گا۔
تقریب سے خطاب کرتے ہوئے وزارتِ اقتصادی امور کے جوائنٹ سیکریٹری محمود خان نے کہا کہ ضم شدہ اضلاع میں مقامی حکومتوں کو مضبوط بنانا پائیدار ترقی اور ایس ڈی جیز کے حصول کے لیے ناگزیر ہے۔
خیبر پختونخوا کے پلاننگ اینڈ ڈویلپمنٹ ڈیپارٹمنٹ کے ڈاکٹر احتشام الحق نے جاپان اور یو این ڈی پی کی معاونت کو خوش آئند قرار دیتے ہوئے کہا کہ اس شراکت داری سے عوامی خدمات، ادارہ جاتی بہتری اور عوامی اعتماد میں نمایاں بہتری آئے گی۔
یو این ڈی پی پاکستان کے ریزیڈنٹ نمائندے ڈاکٹر سیموئل رزق نے کہا کہ یہ منصوبہ ان کمیونٹیز تک خدمات پہنچانے، اداروں کو مضبوط بنانے اور عوامی اعتماد کی بحالی کے عزم کا عملی مظہر ہے، جو ضم شدہ اضلاع کے عوام کی زندگیوں میں حقیقی اور مثبت تبدیلی لائے گا۔
