اسلام آباد (ایم این این) — وفاقی وزیر خزانہ سینیٹر محمد اورنگزیب نے کہا ہے کہ پاکستان اپنے پہلے پانڈا بانڈ کے اجرا کی جانب پیش رفت کر رہا ہے، جس کے تحت ابتدائی مرحلے میں 25 کروڑ ڈالر اکٹھے کرنے کا ہدف مقرر کیا گیا ہے، جبکہ مجموعی پروگرام کا حجم ایک ارب ڈالر ہوگا۔
وزارت خزانہ کے بیان کے مطابق وزیر خزانہ نے فنانس ڈویژن میں ایک اجلاس کی صدارت کی، جس میں پانڈا بانڈ کے اجرا سے متعلق پیش رفت کا جائزہ لیا گیا۔ اجلاس کو ڈیٹ مینجمنٹ آفس اور دیگر اعلیٰ حکام نے منظوریوں، سرمایہ کاروں سے رابطوں اور ریگولیٹری معاملات پر بریفنگ دی۔
پانڈا بانڈ چینی کرنسی رینمنبی میں جاری کیے جاتے ہیں، جو غیر ملکی حکومتوں یا اداروں کو چین کی مقامی بانڈ مارکیٹ تک رسائی فراہم کرتے ہیں اور چینی کرنسی کے عالمی استعمال کو فروغ دیتے ہیں۔
اجلاس میں بتایا گیا کہ کثیر الجہتی شراکت داروں سے مطلوبہ منظوریوں کا حصول مکمل ہو چکا ہے، جبکہ چینی ادارہ جاتی سرمایہ کاروں کے ساتھ مشاورت مثبت رہی ہے۔
بیان کے مطابق سرمایہ کاروں کی جانب سے بھرپور دلچسپی سامنے آئی ہے، جو پاکستان کی معاشی استحکام، اصلاحاتی اقدامات اور بہتر درمیانی مدت کے امکانات پر بڑھتے ہوئے اعتماد کی عکاس ہے۔
حکام نے کہا کہ مارکیٹ کی موجودہ صورتحال سازگار ہے، ضروری دستاویزات اور گارنٹی انتظامات مکمل ہیں اور سرمایہ کاروں کے ساتھ رابطے طے شدہ منصوبے کے مطابق جاری ہیں۔
چینی حکام کی جانب سے حتمی ریگولیٹری منظوری جلد متوقع ہے، جس کے بعد پانڈا بانڈ کا پہلا اجرا جنوری میں کیا جائے گا۔
وزیر خزانہ نے کہا کہ چین کی آن شور بانڈ مارکیٹ میں داخلہ ایک منظم اور محتاط مالی حکمت عملی کا حصہ ہے، جو ذمہ دارانہ قرضہ انتظام کے اصولوں سے ہم آہنگ ہے۔
بیان کے مطابق ایک ارب ڈالر کے پانڈا بانڈ پروگرام کے تحت آئندہ مراحل کے لیے بھی تیاری شروع کر دی گئی ہے، جبکہ چینی ریگولیٹرز کو مکمل طور پر اعتماد میں لیا گیا ہے۔
اجلاس کے اختتام پر وزیر خزانہ نے پیش رفت پر اطمینان کا اظہار کرتے ہوئے کہا کہ پانڈا بانڈ پاکستان کے قرضوں کی پائیداری بہتر بنانے اور مالی وسائل کے دائرہ کار کو وسعت دینے میں اہم کردار ادا کرے گا۔
