ویب ڈیسک (ایم این این) – ایک معروف امریکی اشاعت نے 2025 کو پاکستان اور امریکا کے تعلقات میں ڈرامائی تبدیلی کا سال قرار دیتے ہوئے کہا ہے کہ جنوبی ایشیا میں واشنگٹن کی سفارتی ترجیحات میں نمایاں تبدیلی آئی ہے۔
دی واشنگٹن ٹائمز میں شائع ہونے والے ایک مضمون کے مطابق صدر ڈونلڈ ٹرمپ کی پاکستان کے حوالے سے پالیسی میں واضح تبدیلی دیکھنے میں آئی ہے، جہاں طویل عرصے سے جاری “انڈیا فرسٹ” پالیسی پس منظر میں چلی گئی اور اسلام آباد امریکا کے لیے ایک اہم شراکت دار کے طور پر ابھرا ہے۔
رپورٹ میں مئی 2025 میں پاکستان اور بھارت کے درمیان ہونے والی مختصر مگر شدید کشیدگی کو خطے میں امریکی پالیسی کی تشکیلِ نو کا فیصلہ کن لمحہ قرار دیا گیا ہے۔
مضمون میں فیلڈ مارشل عاصم منیر اور صدر ٹرمپ کے درمیان ابھرتے ہوئے تعلقات پر بھی روشنی ڈالی گئی ہے اور کہا گیا ہے کہ پاکستان کی حیثیت ایک نظرانداز کیے گئے ملک سے بڑھ کر امریکی اسٹریٹجک سوچ کے مرکزی کردار میں تبدیل ہو چکی ہے۔
رپورٹ کے مطابق پاکستان کی ساکھ میں تیزی سے آنے والی بہتری غیر معمولی ہے اور اسے ٹرمپ کی جنوبی ایشیا حکمتِ عملی کا محور قرار دیا گیا ہے۔
ابتدا میں امریکی پالیسی کا مرکز بھارت تھا، جسے کواڈ جیسے علاقائی اتحادوں کے ذریعے مضبوط بنانے کی کوشش کی گئی، جبکہ پاکستان کو نظر انداز کیا جاتا رہا۔
تاہم بھارت میں اندرونی سیاسی مسائل، شہری آزادیوں پر بڑھتی پابندیاں، فوجی کارکردگی میں عدم تسلسل اور سفارتی ناکامیوں نے رفتہ رفتہ اسے ایک قابلِ اعتماد علاقائی استحکام کار کے طور پر کمزور کر دیا۔
رپورٹ کے مطابق پس پردہ انسدادِ دہشت گردی تعاون نے واشنگٹن اور اسلام آباد کے درمیان جمی برف پگھلانے میں اہم کردار ادا کیا اور پاکستان کے تعمیری کردار کے عملی ثبوت فراہم کیے۔
اسی تعاون کے نتیجے میں مارچ میں صدر ٹرمپ نے ایک قومی خطاب کے دوران پاکستان کی غیر متوقع طور پر تعریف کی، جو امریکی پالیسی میں واضح تبدیلی کا اشارہ تھا۔
مضمون میں کہا گیا ہے کہ پاکستان نے اس موقع سے فائدہ اٹھاتے ہوئے محدود تعاون کو اہم سفارتی کامیابیوں میں بدلا۔ جیسے جیسے روابط گہرے ہوئے، تعلقات محض وقتی لین دین سے آگے بڑھ کر وسیع تر اسٹریٹجک شراکت داری میں تبدیل ہوتے گئے، جبکہ مئی 2025 کی پاک–بھارت کشیدگی پالیسی تبدیلی کا آخری محرک ثابت ہوئی۔
