اسلام آباد (ایم این این) — پاکستان نے ہفتے کے روز اسرائیل کی جانب سے وفاقی جمہوریہ صومالیہ کے نام نہاد صومالی لینڈ خطے کو تسلیم کرنے کے اعلان کی سخت مذمت کرتے ہوئے اسے صومالیہ کی خودمختاری، وحدت اور علاقائی سالمیت کو نقصان پہنچانے کی کوشش قرار دیا۔
اسرائیل نے جمعے کے روز صومالی لینڈ کو ایک “آزاد اور خودمختار ریاست” کے طور پر تسلیم کرنے اور سفارتی تعلقات قائم کرنے کے معاہدے کا اعلان کیا تھا۔
ترجمان دفتر خارجہ کے مطابق پاکستان اس اقدام کو یکسر مسترد کرتا ہے اور اسے غیر قانونی اور اشتعال انگیز قرار دیتا ہے۔ بیان میں کہا گیا کہ ایسے اقدامات بین الاقوامی قانون کی کھلی خلاف ورزی ہیں اور نہ صرف صومالیہ بلکہ پورے خطے کے امن و استحکام کے لیے خطرہ ہیں۔
پاکستان نے عالمی برادری پر زور دیا کہ وہ اس نوعیت کے تمام اقدامات کو مسترد کرے اور اسرائیل کو خطے میں امن و استحکام کی کوششوں کو نقصان پہنچانے سے روکنے کے لیے مؤثر کردار ادا کرے۔
دفتر خارجہ نے اس بات کا بھی اعادہ کیا کہ پاکستان فلسطینیوں کو ان کی سرزمین سے جبری بے دخلی کی ہر کوشش کو مکمل طور پر مسترد کرتا ہے۔ بیان میں فلسطینی عوام کی منصفانہ جدوجہد، حق خودارادیت اور 1967 سے قبل کی سرحدوں پر مشتمل ایک خودمختار فلسطینی ریاست کے قیام کے لیے غیر متزلزل حمایت کا اظہار کیا گیا، جس کا دارالحکومت القدس الشریف ہو۔
