مانیٹرنگ ڈیسک (ایم این این) – روس نے پیر کے روز یوکرین پر شمالی روس میں صدر ولادیمیر پیوٹن کی رہائش گاہ کو نشانہ بنانے کی کوشش کا الزام عائد کیا ہے، تاہم ماسکو نے اس دعوے کے حق میں کوئی ثبوت پیش نہیں کیا۔ یوکرین نے ان الزامات کو بے بنیاد قرار دیتے ہوئے کہا ہے کہ ان کا مقصد امن مذاکرات کو سبوتاژ کرنا ہے۔
ان الزامات اور جوابی بیانات نے یوکرین جنگ کے خاتمے کی کوششوں کو ایک اور دھچکا پہنچایا ہے۔ روسی حکام کا کہنا ہے کہ مبینہ واقعے کے بعد وہ مذاکرات سے متعلق اپنی پوزیشن پر نظرثانی کر رہے ہیں، جس سے سفارتی عمل کے مستقبل پر سوالات کھڑے ہو گئے ہیں۔
یہ پیش رفت ایسے وقت میں سامنے آئی ہے جب ایک روز قبل امریکی صدر ڈونلڈ ٹرمپ اور یوکرینی صدر ولودیمیر زیلنسکی کے درمیان ملاقات ہوئی تھی۔ ٹرمپ نے کہا تھا کہ جنگ کے خاتمے کے معاہدے کے قریب پہنچا جا چکا ہے، تاہم علاقائی تنازعات اب بھی ایک بڑی رکاوٹ ہیں۔
روسی وزیر خارجہ سرگئی لاوروف نے دعویٰ کیا کہ 28 اور 29 دسمبر کی درمیانی رات یوکرین نے نووگوروڈ کے علاقے میں پیوٹن کی رہائش گاہ کو 91 طویل فاصلے تک مار کرنے والے ڈرونز سے نشانہ بنانے کی کوشش کی، جنہیں روسی فضائی دفاعی نظام نے تباہ کر دیا۔ ان کے مطابق نہ کوئی جانی نقصان ہوا اور نہ ہی کوئی مالی نقصان۔
لاوروف نے اس مبینہ کارروائی کو “ریاستی دہشت گردی” قرار دیتے ہوئے خبردار کیا کہ روس اس کا جواب دے گا، جبکہ انہوں نے کہا کہ جوابی کارروائی کے اہداف پہلے ہی طے کیے جا چکے ہیں۔
یوکرینی صدر زیلنسکی نے ان الزامات کی سختی سے تردید کرتے ہوئے کہا کہ روس نئے حملوں کا جواز پیدا کرنے کے لیے جھوٹ گھڑ رہا ہے، ممکنہ طور پر کیف اور سرکاری عمارتوں کو نشانہ بنانے کی تیاری کی جا رہی ہے۔ یوکرین کے وزیر خارجہ آندری سیبیہا نے بھی ان دعوؤں کو من گھڑت قرار دیتے ہوئے عالمی برادری سے روسی بیانیے کی مذمت کا مطالبہ کیا۔
دوسری جانب صدر پیوٹن نے اپنے فوجی کمانڈروں کو زاپوریزیا کے پورے علاقے پر قبضے کی کوششیں تیز کرنے کی ہدایت کی، جبکہ روس نے مشرقی یوکرین کے علاقوں سے یوکرینی افواج کے انخلا کا مطالبہ بھی دہرایا۔
سفارتی رابطوں کے باوجود، زاپوریزیا نیوکلیئر پاور پلانٹ اور ڈونباس خطے کا مستقبل جیسے اہم علاقائی مسائل بدستور حل طلب ہیں، جو کسی بھی امن معاہدے کو پیچیدہ بنائے ہوئے ہیں۔
