لاہور (ایم این این): بانی چیئرمین پی ٹی آئی عمران خان اور ان کی اہلیہ بشریٰ بی بی نے توشہ خانہ ٹو کیس میں سنائی گئی سزاؤں کے خلاف اسلام آباد ہائی کورٹ میں الگ الگ اپیلیں دائر کر دی ہیں۔
اپیلوں میں اسپیشل جج سنٹرل کی جانب سے دی گئی 17، 17 سال قید کی سزاؤں کو چیلنج کرتے ہوئے توشہ خانہ ٹو کا فیصلہ کالعدم قرار دینے کی استدعا کی گئی ہے۔
اپیلوں میں مؤقف اختیار کیا گیا ہے کہ ٹرائل کورٹ نے وعدہ معاف گواہ کے بیان پر انحصار کیا، جو قانوناً درست نہیں تھا۔ مزید کہا گیا کہ پراسیکیوشن بانی پی ٹی آئی اور بشریٰ بی بی کے خلاف الزامات ثابت کرنے میں ناکام رہی۔
درخواستوں میں یہ بھی کہا گیا ہے کہ ایک ہی جرم میں بار بار سزا نہیں دی جا سکتی جبکہ اسپیشل سنٹرل عدالت کو اس مقدمے کی سماعت کا اختیار حاصل نہیں تھا۔ اپیلوں میں یہ مؤقف بھی اپنایا گیا کہ صہیب عباسی کو غیر قانونی طور پر سلطانی گواہ بنایا گیا۔
اپیلوں کے مطابق بلغاری جیولری سیٹ توشہ خانہ قواعد کے تحت سابق حکمران جوڑے نے اپنے پاس رکھا تھا۔ مزید کہا گیا کہ مقدمہ بغیر کسی مناسب تفتیش کے قائم کیا گیا اور یہ سیاسی انتقام کے تحت بنایا گیا کیس ہے۔
اسلام آباد ہائی کورٹ نے دونوں اپیلوں پر ڈائری نمبر جاری کر دیے ہیں۔ بانی پی ٹی آئی کی اپیل کو ڈائری نمبر 24560 جبکہ بشریٰ بی بی کی اپیل کو ڈائری نمبر 24561 الاٹ کیا گیا ہے۔
