اسلام آباد (ایم این این): پنجاب ڈیزاسٹر مینجمنٹ اتھارٹی (پی ڈی ایم اے) نے ہفتے کے روز صوبے بھر میں شدید سردی کے پیش نظر الرٹ جاری کرتے ہوئے خبردار کیا ہے کہ 10 سے 16 جنوری کے دوران درجہ حرارت میں نمایاں کمی متوقع ہے۔
پی ڈی ایم اے نے تعلیم، صحت، زراعت، لوکل گورنمنٹ، ٹرانسپورٹ، ریسکیو 1122، پولیس اور دیگر متعلقہ محکموں کو ارسال کردہ مراسلے میں کہا ہے کہ راولپنڈی، مری، گلیات اور پوٹھوہار کے علاقوں میں شدید سردی کے ساتھ برف باری کا امکان ہے، جبکہ صوبے کے مختلف حصوں میں دھند اور اسموگ کی صورتحال بھی خراب ہو سکتی ہے۔
تعلیمی اداروں کو ہدایت کی گئی ہے کہ طلبہ کو گرم لباس سے متعلق آگاہی دی جائے اور کلاس رومز کو سردی سے محفوظ بنایا جائے۔ پی ڈی ایم اے نے کہا کہ اس کا کنٹرول روم چوبیس گھنٹے صورتحال کی نگرانی کر رہا ہے اور تمام ادارے کسی بھی ہنگامی صورتحال سے نمٹنے کے لیے تیار رہیں۔
شہریوں کو غیر ضروری سفر سے گریز کرنے اور سرکاری ہدایات پر عمل کرنے کا مشورہ دیا گیا ہے۔
دوسری جانب، سندھ حکومت نے سرد موسم کے باعث صوبے بھر کے سرکاری اور نجی اسکولوں کے اوقات کار میں تبدیلی کر دی ہے۔ نوٹیفکیشن کے مطابق 12 جنوری سے اسکول صبح 9 بجے کھلیں گے اور یہ شیڈول 26 جنوری تک نافذ العمل رہے گا۔
حکام نے واضح کیا کہ اسکولوں کے بند ہونے کے اوقات میں کوئی تبدیلی نہیں کی گئی اور یہ فیصلہ طلبہ کو صبح کے شدید سرد موسم سے محفوظ رکھنے کے لیے کیا گیا ہے۔
پنجاب میں، صوبائی وزیر تعلیم رانا سکندر حیات نے اعلان کیا کہ شدید سردی کی پیش گوئی کے باعث صوبے بھر کے تمام سرکاری اور نجی اسکولوں میں موسم سرما کی تعطیلات 19 جنوری تک بڑھا دی گئی ہیں۔
وزیر تعلیم نے کہا کہ یہ فیصلہ پی ڈی ایم اے کی سفارشات کی روشنی میں کیا گیا ہے۔ اس سے قبل سوشل میڈیا پر گردش کرنے والے جعلی نوٹیفکیشنز کے باعث والدین اور طلبہ میں الجھن پیدا ہوئی تھی، جس پر حکومت نے وضاحت جاری کی۔
علاوہ ازیں، پنجاب ہائر ایجوکیشن ڈیپارٹمنٹ نے بھی شدید موسم کے باعث کالجوں میں موسم سرما کی تعطیلات 16 جنوری تک بڑھانے کا اعلان کیا ہے، جبکہ تمام کالجز 19 جنوری سے معمول کے مطابق کھلیں گے۔
