راولپنڈی (ایم این این): انڈونیشیا نے پاکستان کے ساتھ دفاعی تعلقات کو مزید مضبوط اور وسعت دینے کی خواہش کا اظہار کیا ہے۔ یہ بات فوج کے شعبہ تعلقات عامہ نے پیر کے روز بتائی۔
آئی ایس پی آر کے مطابق انڈونیشیا کے وزیر دفاع لیفٹیننٹ جنرل (ر) سجافری سجامسو الدین نے راولپنڈی میں جنرل ہیڈکوارٹرز کا دورہ کیا جہاں انہوں نے چیف آف ڈیفنس فورسز اور چیف آف آرمی اسٹاف فیلڈ مارشل سید عاصم منیر سے ملاقات کی۔
ملاقات میں باہمی دلچسپی کے امور، علاقائی و عالمی سلامتی کی صورتحال اور دوطرفہ دفاعی تعاون کو فروغ دینے کے امکانات پر تفصیلی تبادلہ خیال کیا گیا۔ دونوں فریقین نے ادارہ جاتی روابط مضبوط بنانے، تربیتی تعاون بڑھانے اور دفاعی صنعتی اشتراک کو فروغ دینے کی اہمیت پر زور دیا۔
انڈونیشین وزیر دفاع نے پاک فوج کی پیشہ ورانہ صلاحیتوں کو سراہا اور دہشت گردی کے خلاف جنگ میں اس کی قربانیوں کا اعتراف کیا۔ انہوں نے مختلف شعبوں میں پاکستان کے ساتھ دفاعی تعلقات کو مزید وسعت دینے کی خواہش بھی ظاہر کی۔
فیلڈ مارشل سید عاصم منیر نے انڈونیشیا کے ساتھ مشترکہ اقدار، باہمی احترام اور مشترکہ تزویراتی مفادات کی بنیاد پر مضبوط اور دیرپا دفاعی شراکت داری کے فروغ کے لیے پاکستان کے عزم کا اعادہ کیا۔
