کراچی (ایم این این)- پاکستان اسٹاک ایکسچینج میں جمعہ کے روز زبردست تیزی دیکھی گئی، جہاں بینچ مارک کے ایس ای 100 انڈیکس 185 ہزار کی سطح عبور کر کے بند ہوا۔ کاروباری سیشن کے دوران خریداروں کا مکمل غلبہ رہا اور انڈیکس دن کی بلند ترین سطح 185,208.98 تک پہنچ گیا۔
کاروبار کے اختتام پر کے ایس ای 100 انڈیکس 3,642.50 پوائنٹس اضافے کے ساتھ 185,098.83 پر بند ہوا، جو 2.01 فیصد اضافہ ظاہر کرتا ہے۔
ماہرین کے مطابق مارکیٹ میں تیزی کی بنیادی وجہ آئندہ مانیٹری پالیسی کمیٹی کے اجلاس میں شرح سود میں مزید کمی کی توقعات ہیں۔ عارف حبیب لمیٹڈ کی ریسرچ ہیڈ ثنا توقی نے کہا کہ فنڈز اور ادارہ جاتی سرمایہ کاروں کی جانب سے نئی خریداری سامنے آئی جبکہ فروخت کا دباؤ کم ہو گیا۔
ان کا کہنا تھا کہ حالیہ پاکستان انویسٹمنٹ بانڈز نیلامی میں ییلڈز میں کمی کے بعد مارکیٹ شرح سود میں کٹوتی کی توقع کر رہی ہے، جس سے سرمایہ کاروں کا اعتماد بحال ہوا۔
آٹو موبائل، سیمنٹ، کمرشل بینکس، فرٹیلائزر، آئل اینڈ گیس ایکسپلوریشن، آئل مارکیٹنگ کمپنیوں اور پاور سیکٹر میں نمایاں خریداری دیکھی گئی۔ HUBCO، ماری، او جی ڈی سی، پول، پی پی ایل، پی ایس او، ایس ایس جی سی، ایس این جی پی ایل، ایم سی بی، ایم ای بی ایل، این بی پی اور یو بی ایل جیسے بڑے حصص سبز نشان میں بند ہوئے۔
سرمایہ کاروں کے اعتماد کو اس فیصلے سے بھی تقویت ملی کہ وفاقی حکومت نے 16 جنوری 2026 سے آئندہ پندرہ روز کے لیے پیٹرولیم مصنوعات کی قیمتیں برقرار رکھنے کا اعلان کیا۔ ہائی اسپیڈ ڈیزل کی قیمت 257.08 روپے فی لیٹر اور پیٹرول کی قیمت 253.17 روپے فی لیٹر برقرار رکھی گئی ہے۔
واضح رہے کہ اس سے ایک روز قبل جمعرات کو مارکیٹ شدید اتار چڑھاؤ اور فروخت کے دباؤ کے باعث مندی کا شکار رہی تھی، جس کے نتیجے میں کے ایس ای 100 انڈیکس 1,113.48 پوائنٹس یا 0.61 فیصد کمی کے ساتھ 181,456.34 پر بند ہوا۔
