لاہور (ایم این این): بشریٰ بی بی کی بیٹی مبشرہ خاور مانیکا نے پیر کے روز لاہور ہائی کورٹ میں اپنی والدہ سے ملاقات کی اجازت کے لیے دائر درخواست واپس لے لی۔
مبشرہ مانیکا نے 16 جنوری کو لاہور ہائی کورٹ سے رجوع کیا تھا، جس میں انہوں نے جیل میں قید اپنی والدہ بشریٰ بی بی سے ملاقات کی اجازت طلب کی تھی، جو بانی پی ٹی آئی عمران خان کی اہلیہ ہیں۔ تاہم عدالت کے رجسٹرار آفس نے درخواست کے قابل سماعت ہونے پر اعتراض اٹھاتے ہوئے درخواست گزار کو راولپنڈی بینچ سے رجوع کرنے کی ہدایت کی تھی۔
سماعت کے دوران جسٹس فاروق حیدر نے دائرہ اختیار سے متعلق رجسٹرار آفس کا اعتراض برقرار رکھتے ہوئے ریمارکس دیے کہ یہ درخواست لاہور ہائی کورٹ کے پرنسپل سیٹ پر قابل سماعت نہیں۔ اس کے بعد درخواست گزار کے وکیل نے درخواست واپس لے لی، جس پر عدالت نے کیس نمٹا دیا۔
درخواست لاہور ہائی کورٹ بار ایسوسی ایشن کے صدر ملک آصف نِسوانہ کے توسط سے دائر کی گئی تھی، جس میں انسپکٹر جنرل جیل خانہ جات، سپرنٹنڈنٹ اڈیالہ جیل راولپنڈی سمیت دیگر کو فریق بنایا گیا تھا۔
درخواست میں مؤقف اختیار کیا گیا تھا کہ اڈیالہ جیل انتظامیہ نے کسی تحریری وجہ کے بغیر مبشرہ مانیکا کو اپنی قید والدہ سے ملاقات سے روک رکھا ہے۔ درخواست میں کہا گیا تھا کہ منگل کا دن ملاقات کے لیے مقرر ہونے کے باوجود، اور قریبی رشتہ دار ہونے کے باوجود، ملاقات کی اجازت نہیں دی گئی۔
درخواست میں بشریٰ بی بی کی جسمانی، جذباتی اور نفسیاتی صحت پر تشویش کا اظہار کرتے ہوئے جیل حکام کے اقدام کو بدنیتی اور اختیارات کے ناجائز استعمال کے مترادف قرار دیا گیا تھا اور فوری ملاقات کی اجازت دینے کی استدعا کی گئی تھی۔
واضح رہے کہ بشریٰ بی بی اس وقت 190 ملین پاؤنڈ کرپشن کیس میں سات سال قید کی سزا کاٹ رہی ہیں، جبکہ حال ہی میں انہیں توشہ خانہ ٹو کیس میں بھی 17 سال قید کی سزا سنائی گئی ہے، جو 2021 میں سعودی ولی عہد کی جانب سے سابق وزیر اعظم عمران خان کو تحفے میں دیے گئے قیمتی زیورات کی مبینہ خریداری سے متعلق ہے۔
