لندن (ایم این این): آرسنل اگرچہ فوری طور پر گھبراہٹ کا شکار نہیں، تاہم پریمیئر لیگ ٹائٹل کی دوڑ میں دباؤ کے آثار نمایاں ہونے لگے ہیں، جب اتوار کو مانچسٹر یونائیٹڈ نے انہیں ایمریٹس اسٹیڈیم میں 3-2 سے شکست دے دی۔
دوسرے ہاف میں پیٹرک ڈورگو اور متبادل کھلاڑی ماتھیوس کونیا کے شاندار گولز نے یونائیٹڈ کو 2017 کے بعد پہلی مرتبہ آرسنل کے خلاف لیگ میں فتح دلائی، جس کے نتیجے میں ٹائٹل کی دوڑ ایک بار پھر کھل گئی۔
آرسنل سات پوائنٹس کی برتری بحال کرنے میں ناکام رہا اور تمام مقابلوں میں سیزن کی پہلی ہوم شکست کے بعد اب وہ مانچسٹر سٹی اور آسٹن ولا سے صرف چار پوائنٹس آگے ہے۔
مانچسٹر سٹی نے ہفتے کے روز وولورہیمپٹن کو شکست دے کر جیت کی راہ پر واپسی کی، جبکہ آسٹن ولا نے اتوار کو نیو کاسل یونائیٹڈ کو 2-0 سے ہرا دیا۔ ایمیلیانو بوئنڈیا نے پہلے ہاف میں گول کیا جبکہ اولی واٹکنز نے اختتامی لمحات میں کامیابی پر مہر ثبت کی۔
آرسنل اب لیگ میں لگاتار تین میچز سے فتح سے محروم ہے اور 23 میچز میں 50 پوائنٹس کے ساتھ سرفہرست ہے۔ مانچسٹر سٹی اور آسٹن ولا 46، جبکہ بہتر کارکردگی دکھانے والی مانچسٹر یونائیٹڈ 38 پوائنٹس کے ساتھ چوتھے نمبر پر ہے۔
چیلسی 37 پوائنٹس کے ساتھ پانچویں نمبر پر ہے، جس نے کرسٹل پیلس کو 3-1 سے شکست دی۔ ایسٹیوو، جواؤ پیڈرو اور اینزو فرنینڈز نے گول اسکور کیے، جبکہ پیلس کی جانب سے کرس رچرڈز نے واحد گول کیا۔ میزبان ٹیم کے ایڈم وارٹن کو ریڈ کارڈ دکھایا گیا۔
ناٹنگھم فاریسٹ نے برینٹفورڈ کے خلاف 2-0 کامیابی حاصل کر کے تنزلی کے زون سے پانچ پوائنٹس کا فاصلہ بنا لیا۔
آرسنل 2004 کے بعد پہلی بار لیگ ٹائٹل کے حصول کی کوشش کر رہا ہے اور حالیہ دنوں میں سٹی اور ولا کی لغزشوں کے باعث مضبوط برتری حاصل کر سکتا تھا، تاہم مسلسل بغیر گول ڈراز کے بعد یہ شکست ٹیم کے لیے تشویش کا باعث بن گئی۔
آرسنل کے منیجر میکل آرٹیٹا نے کہا کہ مانچسٹر یونائیٹڈ کو کریڈٹ دینا ہوگا، ہم سے ایک غیر معمولی اور تکلیف دہ غلطی ہوئی، اس کے بعد انہوں نے دو شاندار گول کیے، ہم اپنی بہترین کارکردگی نہ دکھا سکے اور اس کی قیمت چکانا پڑی۔
میچ میں آرسنل اس وقت بہتر پوزیشن میں دکھائی دے رہا تھا جب 29ویں منٹ میں لیساندرو مارٹینز کے اپنے گول نے انہیں برتری دلا دی۔ تاہم 37ویں منٹ میں مارٹن زوبیمنڈی کی غلطی پر برائن ایمبیومو نے یونائیٹڈ کے لیے برابر کا گول کر دیا۔
دوسرے ہاف کے آغاز میں ڈورگو کے زوردار والی گول نے یونائیٹڈ کو سبقت دلائی، مگر اختتامی لمحات میں متبادل کھلاڑی میکل میرینو نے کارنر پر گول کر کے مقابلہ برابر کر دیا۔ تاہم کونیا نے 25 میٹر سے شاندار شاٹ لگا کر یونائیٹڈ کو فتح دلائی۔
ادھر سینٹ جیمز پارک میں آسٹن ولا نے یوروپا لیگ میں فنرباخچے کے خلاف میچ کے بعد کم وقت کی تیاری کے باوجود نیو کاسل کو شکست دی۔ 19ویں منٹ میں بوئنڈیا نے اسکورنگ کا آغاز کیا جبکہ 88ویں منٹ میں واٹکنز کے ہیڈر نے جیت یقینی بنائی۔
ناٹنگھم فاریسٹ نے دباؤ کا مثبت جواب دیتے ہوئے برینٹفورڈ کو شکست دی، جہاں ایگور جیزس اور تائیوو آوونیئی کے گول فیصلہ کن ثابت ہوئے۔ فاریسٹ پوائنٹس ٹیبل پر لیڈز یونائیٹڈ کے برابر آ گیا۔
