یووُو، جی جیانگ (ایم این این): چین کی سب سے بڑی ہول سیل مارکیٹ، یووُو انٹرنیشنل ٹریڈ سٹی میں قمری نئے سال سے قبل خریدار ایک منفرد اور غیر متوقع کھلونے کی تلاش میں ایک چھوٹی سی دکان کا رخ کر رہے ہیں۔
سرخ رنگ کے اس پلوش گھوڑے کی جھکی ہوئی مسکراہٹ، گلے میں سنہری گھنٹی اور جھکی ہوئی نظریں اسے عام کھلونوں سے مختلف بناتی ہیں۔ یہ کھلونا سوشل میڈیا پر تیزی سے مقبول ہو رہا ہے، جبکہ اس سال چینی کیلنڈر کے مطابق گھوڑے کا سال منایا جا رہا ہے۔
آن لائن صارفین نے اسے ’رونے والا گھوڑا‘ کا نام دیا ہے۔ یہ کھلونا دراصل خوشی کے اظہار کے لیے ڈیزائن کیا گیا تھا، مگر فیکٹری میں ہونے والی ایک معمولی غلطی نے اس کی مسکراہٹ کو اداسی میں بدل دیا۔
ہیپی سسٹر نامی دکان کی مالک ژانگ ہوچنگ کے مطابق ایک کارکن نے غلطی سے گھوڑے کا منہ الٹا سی دیا تھا۔
انہوں نے بتایا کہ نقص سامنے آنے پر رقم واپس کرنے کی پیشکش کی گئی، مگر خریدار واپس نہیں آیا۔ کچھ ہی دنوں بعد اس کھلونے کی تصاویر سوشل میڈیا پر گردش کرنے لگیں۔
ژانگ کے مطابق لوگ مذاق میں کہتے ہیں کہ رونے والا گھوڑا دفتر میں کام کے دوران چہرے کے تاثرات کی عکاسی کرتا ہے، جبکہ مسکراتا گھوڑا کام کے بعد کی کیفیت دکھاتا ہے۔
مانگ میں اضافے کے بعد دکان نے اداس چہرے والے گھوڑے کی تیاری جاری رکھنے کا فیصلہ کیا۔ چین کے کئی نوجوان ملازمین کا کہنا ہے کہ اس کھلونے کا اداس تاثر ان کی طویل اوقاتِ کار اور ذہنی دباؤ کی نمائندگی کرتا ہے۔
یہ کھلونا چین میں مقبول ہوتی ’بدصورت مگر پیاری‘ کھلونوں کی روایت کا بھی حصہ بن چکا ہے، جسے حالیہ برسوں میں لیبوبو جیسے کرداروں نے فروغ دیا۔
یووُو کے ایک تاجر لو ژینشیان نے، جو 25 سال سے تہواروں کے کھلونے فروخت کر رہے ہیں، کہا کہ اب تقریباً ہر آنے والا گاہک رونے والے گھوڑے کے بارے میں پوچھتا ہے۔
دوپہر تک ہیپی سسٹر کی دکان کے باہر رکھے گئے تمام کھلونے فروخت ہو چکے تھے اور عملہ دوبارہ اسٹاک لگانے میں مصروف تھا۔
ژانگ ہوچنگ نے کہا کہ یہ کھلونا فروخت ہوتا رہے گا کیونکہ یہ جدید دور کے کام کرنے والے افراد کی زندگی کی حقیقی تصویر پیش کرتا ہے۔
