ویب ڈیسک (ایم این این) – برطانوی وزیراعظم کیر اسٹارمر نے بدھ کے روز چین کا سرکاری دورہ شروع کیا، جو 2018 کے بعد کسی بھی برطانوی وزیراعظم کا پہلا دورہ ہے۔ اس دورے کا مقصد بیجنگ کے ساتھ تعلقات کو مضبوط بنانا ہے، جبکہ امریکہ کے ساتھ تعلقات میں بڑھتی غیر یقینی صورتحال بھی پس منظر میں موجود ہے۔
کیر اسٹارمر نے اپنے ہمراہ آنے والے 50 سے زائد برطانوی کاروباری رہنماؤں سے خطاب کرتے ہوئے کہا کہ چین میں تجارتی مواقع سے فائدہ اٹھانا ضروری ہے، تاہم ممکنہ سیکیورٹی خدشات پر نظر رکھنا بھی ناگزیر ہے۔ انہوں نے کہا کہ آٹھ سال بعد ہونے والا یہ دورہ تاریخی حیثیت رکھتا ہے اور اس کا مقصد برطانیہ کے عوام کے لیے عملی فوائد حاصل کرنا ہے۔
وزیراعظم جمعرات کو چینی صدر شی جن پنگ اور وزیر اعظم لی چھیانگ سے ملاقات کریں گے۔ یہ دورہ برطانیہ اور چین کے تعلقات میں ممکنہ تبدیلی کی علامت سمجھا جا رہا ہے، جو گزشتہ برسوں میں ہانگ کانگ، یوکرین جنگ اور جاسوسی کے الزامات کے باعث کشیدہ رہے ہیں۔
چین کے لیے یہ دورہ ایک ایسے وقت میں خود کو ایک مستحکم اور قابلِ اعتماد شراکت دار کے طور پر پیش کرنے کا موقع ہے جب عالمی سیاست میں بے یقینی بڑھ رہی ہے۔
اسٹارمر نے کہا کہ چین سے لاتعلقی برطانیہ کے مفاد میں نہیں اور کئی مغربی ممالک امریکی صدر ڈونلڈ ٹرمپ کی غیر متوقع پالیسیوں کے باعث چین کے ساتھ سفارتی روابط بڑھا رہے ہیں۔
انہوں نے واضح کیا کہ چین کے ساتھ معاشی تعاون بڑھانے سے امریکہ کے ساتھ برطانیہ کے قریبی دفاعی، سیکیورٹی اور تجارتی تعلقات متاثر نہیں ہوں گے۔ وزیراعظم نے حساس امور پر بات کرنے سے گریز کیا تاہم ویزا سہولتوں میں بہتری کی امید ظاہر کی اور اس تاثر کو مسترد کیا کہ برطانیہ کو امریکہ اور یورپ میں سے کسی ایک کا انتخاب کرنا ہوگا۔
