لاہور (ایم این این) – آسٹریلیا کی کرکٹ ٹیم بدھ کے روز لاہور پہنچ گئی، جہاں وہ آئندہ ماہ ہونے والے آئی سی سی مینز ٹی ٹوئنٹی ورلڈ کپ کی تیاریوں کے سلسلے میں پاکستان کے خلاف ٹی ٹوئنٹی انٹرنیشنل سیریز کھیلے گی۔
یہ آسٹریلیا کا پاکستان کا تیسرا دورہ ہے۔ اس سے قبل مارچ اور اپریل 2022 میں دونوں ٹیموں کے درمیان تین ٹیسٹ اور ایک ون ڈے سیریز کھیلی گئی تھی، جس کے بعد قذافی اسٹیڈیم میں ایک واحد ٹی ٹوئنٹی میچ ہوا تھا، جس میں آسٹریلیا نے تین وکٹوں سے کامیابی حاصل کی تھی۔ آسٹریلیا نے 2025 چیمپئنز ٹرافی کے تین میچز بھی پاکستان میں کھیلے تھے۔
پاکستان کرکٹ بورڈ کے مطابق تینوں ٹی ٹوئنٹی میچز 29 جنوری، 31 جنوری اور یکم فروری کو لاہور کے قذافی اسٹیڈیم میں کھیلے جائیں گے۔
لاہور میں پریس کانفرنس سے خطاب کرتے ہوئے آسٹریلوی کپتان مچل مارش نے پاکستانی ٹیم کی تعریف کی اور کہا کہ پاکستان میں کھیلنا ورلڈ کپ کی تیاری کے لیے ایک اہم چیلنج ہے۔
انہوں نے کہا کہ پاکستان کی فاسٹ بولنگ کی روایت شاندار رہی ہے اور خاص طور پر شاہین شاہ آفریدی ایک بہترین بولر ہیں، جن کا سامنا کرنا آسٹریلوی ٹیم کے لیے بڑا امتحان ہوگا۔
مچل مارش نے کہا کہ یہ دورہ ورلڈ کپ کی تیاری کے لیے انتہائی اہم ہے، تاہم کچھ کھلاڑی فٹنس اور ٹریننگ کے باعث بعد میں سری لنکا میں ٹیم کو جوائن کریں گے۔
سیریز کے لیے آسٹریلیا کے پانچ سینئر کھلاڑی پیٹ کمنز، جوش ہیزل ووڈ، گلین میکسویل، ٹم ڈیوڈ اور نیتھن ایلس کو آرام دیا گیا ہے۔
پاکستان کے اسٹار بیٹر بابر اعظم کے بارے میں بات کرتے ہوئے مارش نے کہا کہ وہ ایک طویل عرصے سے عالمی معیار کے کھلاڑی ہیں اور ہوم کنڈیشنز میں اب بھی دنیا کے بہترین بلے بازوں میں شمار ہوتے ہیں۔
ادھر پاکستانی کپتان سلمان علی آغا نے میڈیا سے گفتگو میں کہا کہ بین الاقوامی کرکٹ میں کوئی بھی ٹیم آسان نہیں ہوتی۔ انہوں نے کہا کہ پاکستان کی توجہ اپنی کارکردگی بہتر بنانے اور درست حکمت عملی پر عملدرآمد پر ہے۔
سلمان علی آغا نے واضح کیا کہ آسٹریلوی سینئر کھلاڑیوں کی عدم موجودگی کو پاکستان کے لیے آسان موقع قرار دینا درست نہیں، کیونکہ ہر آسٹریلوی کھلاڑی جارحانہ اور جیتنے کی سوچ کے ساتھ میدان میں اترتا ہے۔
