لاہور (ایم این این) – وزیراعلیٰ پنجاب مریم نواز نے اتوار کو صوبے میں طویل تعطیلات کا اعلان کرتے ہوئے 6 فروری کو بسنت کی سرکاری چھٹی دینے کا اعلان کیا۔
سوشل میڈیا پلیٹ فارم ایکس پر جاری بیان میں وزیراعلیٰ نے کہا کہ 5 فروری کو یومِ کشمیر، 6 فروری کو بسنت کی صوبائی چھٹی اور اس کے بعد ہفتہ اور اتوار کی تعطیلات کے باعث پنجاب میں طویل ویک اینڈ ہوگا۔ انہوں نے امید ظاہر کی کہ عوام اس موقع سے فائدہ اٹھاتے ہوئے آرام اور تفریح کریں گے۔
یاد رہے کہ پنجاب میں بسنت کے تہوار پر 2007 میں پابندی عائد کی گئی تھی، جس کی وجہ دھاتی اور تیز ڈور کے باعث ہونے والی ہلاکتیں اور سنگین زخمی ہونے کے واقعات تھے، خاص طور پر موٹر سائیکل سوار اور ان کے ساتھ بیٹھنے والے افراد متاثر ہوئے تھے، جبکہ ہوائی فائرنگ کے واقعات بھی رپورٹ ہوئے تھے۔
اب پنجاب حکومت نے 18 سال بعد سخت ضوابط کے تحت تاریخی بسنت تہوار بحال کرنے کا فیصلہ کیا ہے، جس کے تحت لاہور میں 6 فروری سے تین روزہ بسنت فیسٹیول کا انعقاد کیا جائے گا۔
