اسلام آباد (ایم این این): وفاقی وزیر داخلہ محسن نقوی نے جمعرات کو اسلام آباد میں چین کے سفیر جیانگ زائی دونگ سے اہم ملاقات کی، جس میں انہوں نے واضح کیا کہ چینی شہریوں اور منصوبوں کی مکمل سکیورٹی پاکستان کی اولین ترجیح ہے۔
وزارت داخلہ کے جاری کردہ بیان کے مطابق ملاقات کے دوران وزیر داخلہ نے سفیر کو بلوچستان کی مجموعی سکیورٹی صورتحال پر بریفنگ دی، جہاں حالیہ دہشت گرد حملوں کے باعث حالات کشیدہ رہے۔
چینی سفیر نے بلوچستان میں شہریوں اور سکیورٹی فورسز پر ہونے والے دہشت گرد حملوں کی شدید مذمت کی اور متاثرہ خاندانوں سے دلی ہمدردی اور تعزیت کا اظہار کیا۔ انہوں نے کہا کہ چین اس مشکل گھڑی میں متاثرین کے ساتھ مکمل یکجہتی کا اظہار کرتا ہے اور دہشت گردی کے خلاف پاکستان کے شانہ بشانہ کھڑا ہے۔
وزیر داخلہ محسن نقوی نے بتایا کہ بلوچستان میں دہشت گردی منظم اور سوچے سمجھے منصوبے کے تحت کی گئی، تاہم سکیورٹی فورسز نے بروقت اور مؤثر کارروائیاں کیں۔ انہوں نے چینی شہریوں اور منصوبوں کے تحفظ کے لیے کیے گئے اقدامات سے بھی سفیر کو آگاہ کیا۔
انہوں نے کہا کہ پاکستان اور چین کی دوستی کو کوئی دشمن نقصان نہیں پہنچا سکتا اور چینی شہریوں کی حفاظت انتہائی اہمیت کی حامل ہے۔ وزیر داخلہ نے بتایا کہ چینی شہریوں کے لیے خصوصی حفاظتی یونٹ قائم کیا جا رہا ہے جبکہ جدید چینی ٹیکنالوجی انسداد دہشت گردی کی کارروائیوں میں معاون ثابت ہوگی۔
ملاقات کے دوران انسداد دہشت گردی، داخلی سلامتی اور سکیورٹی تعاون پر تفصیلی تبادلہ خیال کیا گیا اور انٹیلی جنس شیئرنگ اور سائبر کرائم کے شعبے میں تعاون بڑھانے پر اتفاق کیا گیا۔
چینی سفیر نے پاکستانی حکومت کی جانب سے کیے گئے سکیورٹی اقدامات کو سراہا، جبکہ وزیر داخلہ نے ہر موقع پر چین کی مسلسل حمایت پر شکریہ ادا کیا۔
