واشنگٹن (ایم این این): وزارتِ خزانہ نے جمعرات کو اعلان کیا کہ پاکستان اور امریکا نے نیویارک میں واقع روزویلٹ ہوٹل کی آپریشن، دیکھ بھال، تزئین و آرائش اور ازسرنو ترقی کے لیے ایک اسٹریٹجک اقتصادی اقدام کا باقاعدہ آغاز کر دیا ہے۔
بیان کے مطابق اس منصوبے میں امریکی جنرل سروسز ایڈمنسٹریشن (جی ایس اے) کے ساتھ تعاون شامل ہوگا تاکہ ہوٹل کی ازسرنو ترقی ممکن بنائی جا سکے۔
وزارت نے بتایا کہ یہ اشتراک امریکی خصوصی ایلچی اسٹیو وٹکوف نے صدر ڈونلڈ جے ٹرمپ کی قیادت میں طے کیا۔
شراکت داری کو باضابطہ بنانے کے لیے دونوں حکومتوں نے مفاہمتی یادداشت (ایم او یو) پر دستخط کیے۔ اس پر جی ایس اے کے ایڈمنسٹریٹر ایڈورڈ سی فورسٹ اور وزیر خزانہ محمد اورنگزیب نے دستخط کیے، جبکہ وزیر اعظم شہباز شریف اور وٹکوف بھی اس موقع پر موجود تھے۔
ایم او یو کے تحت تکنیکی، تجارتی اور معاشی پہلوؤں کا مشترکہ اور مرحلہ وار جائزہ لینے کے لیے ایک باقاعدہ فریم ورک قائم کیا گیا ہے، جس کا مقصد شفافیت، ضابطہ جاتی وضاحت اور باہمی مفاد کو یقینی بنانا ہے۔
بیان میں کہا گیا کہ مین ہیٹن میں ہوٹل کا اہم محل وقوع اور نیویارک کے پیچیدہ زوننگ قوانین اس منصوبے کو حساس بناتے ہیں، تاہم ادارہ جاتی ہم آہنگی سے خطرات کم اور سرمایہ کاری کی قدر زیادہ کی جا سکے گی۔
حکومت کا کہنا ہے کہ مقصد اس تاریخی جائیداد سے زیادہ سے زیادہ مالی فائدہ حاصل کرنا ہے، جو نجکاری حکمت عملی سے ہم آہنگ ہوگا اور پاکستان–امریکا اقتصادی تعلقات کو مزید مضبوط کرے گا۔
سابق امریکی صدر تھیوڈور روزویلٹ کے نام سے منسوب یہ صدی پرانا ہوٹل پاکستان کے اہم ترین غیر ملکی اثاثوں میں شمار ہوتا ہے۔ 2000 میں حاصل کیا گیا یہ ایک ہزار سے زائد کمروں پر مشتمل ہوٹل مالی نقصانات کے باعث 2020 میں بند کر دیا گیا تھا اور کچھ عرصہ تارکین وطن کی رہائش کے طور پر بھی استعمال ہوا۔
یہ ہوٹل گرینڈ سینٹرل ٹرمینل، ٹائمز اسکوائر اور ففتھ ایونیو جیسے اہم مقامات کے قریب واقع ہے، جو اسے مین ہیٹن کے قیمتی ترین تجارتی علاقوں میں شامل کرتا ہے۔
