اسپورٹس ڈیسک (ایم این این): نیوزی لینڈ قومی کرکٹ ٹیم نے سری لنکا قومی کرکٹ ٹیم کو آئی سی سی مینز ٹی ٹوئنٹی ورلڈ کپ کے سپر ایٹ مرحلے میں بدھ کے روز اکسٹھ رنز سے شکست دے کر ٹورنامنٹ سے باہر کر دیا جبکہ پاکستان کی سیمی فائنل تک رسائی کی امیدوں کو بھی دھچکا پہنچایا۔
گروپ ایک کے میچ میں آر پریماداسا اسٹیڈیم میں ایک سو انہتر رنز کے ہدف کے تعاقب میں سری لنکا کی ٹیم مقررہ بیس اوورز میں آٹھ وکٹوں کے نقصان پر صرف ایک سو سات رنز بنا سکی۔
اس سے قبل سری لنکا نے ٹاس جیت کر پہلے فیلڈنگ کا فیصلہ کیا اور ابتدائی وکٹیں حاصل کیں، تاہم وہ نیوزی لینڈ کو ایک سو اڑسٹھ رنز سات کھلاڑی آؤٹ ہونے سے نہ روک سکی۔ کیوی ٹیم نے جارحانہ آغاز کیا لیکن مڈل اوورز میں وکٹیں گرنے سے اسکور چھیاسی رنز پر چھ وکٹ ہو گیا۔
راچن رویندرا بتیس رنز کے ساتھ نمایاں رہے، فن ایلن نے تئیس اور گلین فلپس نے اٹھارہ رنز بنائے۔ ٹم سیفرٹ آٹھ، ڈیرل مچل تین رنز بنا سکے جبکہ مارک چیپ مین کھاتہ کھولے بغیر آؤٹ ہوئے۔
کپتان مچل سینٹنر اور کول میک کونچی کے درمیان ساتویں وکٹ کی چوراسی رنز کی شراکت نے میچ کا رخ بدل دیا۔ دونوں نے اڑتالیس گیندوں پر یہ اہم شراکت قائم کی جس سے ٹیم ایک مضبوط مجموعے تک پہنچی۔ سینٹنر سینتالیس رنز بنا کر نمایاں رہے جبکہ میک کونچی اکتیس رنز کے ساتھ ناٹ آؤٹ رہے۔
سری لنکا کی جانب سے مہیش تھیکشانا اور دشمنتھا چمیرا نے تین تین وکٹیں حاصل کیں جبکہ دونتھ ویلالاگے نے ایک کھلاڑی کو آؤٹ کیا۔
جواب میں سری لنکن ٹیم ابتدا ہی سے دباؤ کا شکار رہی اور وقفے وقفے سے وکٹیں گنواتی رہی، جس کے باعث وہ ہدف سے خاصی دور رہ گئی اور ٹورنامنٹ سے باہر ہو گئی۔
سری لنکا کے کپتان داسن شناکا نے ٹیم میں ایک تبدیلی کرتے ہوئے کامل مشارا کی جگہ چارتھ اسالنکا کو شامل کیا تھا۔
اس کامیابی سے نیوزی لینڈ کی سیمی فائنل تک رسائی کی امیدیں مزید مضبوط ہو گئیں جبکہ سری لنکا ایونٹ سے باہر ہو گیا اور پاکستان کے لیے اگلے مرحلے میں پہنچنا مزید مشکل ہو گیا۔
