جدہ (ایم این این) – نائب وزیر اعظم اور وزیر خارجہ اسحاق ڈار نے جمعہ کے روز مقبوضہ مغربی کنارے کے وسیع علاقوں کو اسرائیل کی جانب سے ’’ریاستی ملکیت‘‘ قرار دینے کے فیصلے کی سخت مذمت کرتے ہوئے اسے بین الاقوامی قانون کی کھلی خلاف ورزی اور توسیع پسندانہ ذہنیت کا مظہر قرار دیا۔
انہوں نے یہ بیان تنظیم تعاون اسلامی کے ایگزیکٹو کمیٹی کے اجلاس سے خطاب کرتے ہوئے دیا، جو سعودی عرب کے شہر جدہ میں منعقد ہوا۔ اجلاس ایسے وقت میں ہوا جب اسرائیلی حکومت نے پہلی بار انیس سو سڑسٹھ کے بعد مغربی کنارے کے بڑے حصوں کو ریاستی ملکیت کے طور پر رجسٹر کرنے کی منظوری دی۔
وزیر خارجہ نے کہا کہ یہ اقدامات غیر قانونی ہیں اور اسرائیل کی الحاق اور توسیع پر مبنی پالیسی کی عکاسی کرتے ہیں۔ انہوں نے کہا کہ جنگ بندی کی خلاف ورزیاں، غیر قانونی بستیوں کی توسیع اور الحاق کی کوششیں مشرق وسطیٰ میں منصفانہ اور پائیدار امن کی راہ میں رکاوٹ ہیں۔
انہوں نے ستمبر دو ہزار پچیس میں اقوام متحدہ کی جنرل اسمبلی کے موقع پر ہونے والی مشاورت کا حوالہ دیتے ہوئے کہا کہ آٹھ اسلامی ممالک کے رہنماؤں نے امریکا کے صدر سے ملاقات میں غزہ میں خونریزی کے خاتمے اور مستقل جنگ بندی کے لیے بات چیت کی تھی اور یقین دہانیاں کرائی گئی تھیں کہ مغربی کنارے کا الحاق نہیں ہوگا، تاہم زمینی حقائق اس کے برعکس ہیں۔
اسحاق ڈار نے کہا کہ اسرائیلی اقدامات بین الاقوامی قانون، اقوام متحدہ کے منشور اور سلامتی کونسل کی متعلقہ قراردادوں کی خلاف ورزی ہیں اور یہ خطے کے استحکام کو نقصان پہنچا رہے ہیں۔
انہوں نے عالمی برادری پر زور دیا کہ وہ اسرائیلی خلاف ورزیوں کو روکنے کے لیے فیصلہ کن اقدامات کرے اور سابقہ یقین دہانیوں پر عمل درآمد یقینی بنائے۔ انہوں نے کہا کہ پاکستان دیگر اسلامی ممالک کے ساتھ مل کر مستقل جنگ بندی، غزہ کی تعمیر نو اور آزاد فلسطینی ریاست کے قیام کے لیے سنجیدہ سیاسی عمل کے آغاز کا حامی ہے۔
انہوں نے مقبوضہ فلسطینی علاقوں بشمول مغربی کنارے کے الحاق کی تمام کوششوں کی فوری واپسی کا مطالبہ کیا اور مسجد اقصیٰ سمیت مقدس مقامات کے تحفظ پر زور دیا۔ ساتھ ہی فلسطینیوں کی بے دخلی اور آبادی کے تناسب میں تبدیلی کے اقدامات کے خاتمے کا بھی مطالبہ کیا۔
انہوں نے غزہ کی تعمیر نو فلسطینی ملکیت اور قیادت میں کرنے اور جنگی جرائم پر جوابدہی کو یقینی بنانے کی ضرورت پر زور دیا۔
امریکا کے اسرائیل میں سفیر مائیک ہکابی کے بیان کا حوالہ دیتے ہوئے وزیر خارجہ نے کہا کہ اس نوعیت کے بیانات غیر ذمہ دارانہ اور سفارتی کوششوں کے منافی ہیں۔
اسحاق ڈار نے کہا کہ پاکستان برادر عرب ممالک کی علاقائی سالمیت کے دفاع میں ان کے ساتھ کھڑا ہے اور کسی بھی ناجائز قبضے کو قانونی جواز دینے کی کوشش کی مخالفت جاری رکھے گا۔ انہوں نے فلسطین کے ساتھ ساتھ مقبوضہ کشمیر کے مسئلے کے منصفانہ حل کے لیے بھی او آئی سی سے مؤثر کردار ادا کرنے کی اپیل کی۔
انہوں نے کہا کہ فلسطینی عوام کی تکالیف کے خاتمے اور آزادی کے حصول کے لیے ٹھوس اقدامات ناگزیر ہیں اور پاکستان او آئی سی ممالک کے ساتھ مل کر اس مقصد کے لیے پرعزم ہے۔
وزیر خارجہ دو روزہ دورے پر سعودی عرب پہنچے ہیں اور اجلاس کے موقع پر رکن ممالک کے وزرائے خارجہ سے دوطرفہ ملاقاتیں بھی کریں گے۔
