گلگت (ایم این این): گلگت بلتستان حکومت نے امن و امان کی بگڑتی ہوئی صورتحال کے پیش نظر گلگت اور اسکردو میں تین روزہ کرفیو نافذ کر دیا ہے اور سول انتظامیہ کی معاونت کے لیے پاک فوج کی تعیناتی کی درخواست بھی کر دی ہے۔
ہوم اینڈ پریزنز ڈیپارٹمنٹ کی جانب سے جاری کردہ نوٹیفکیشن کے مطابق یہ فیصلہ خطے میں پیدا ہونے والی نازک سیکیورٹی صورتحال کے باعث کیا گیا۔ یہ صورتحال ایران کے سپریم لیڈر آیت اللہ علی خامنہ ای کی مبینہ طور پر امریکہ اور اسرائیل کے فضائی حملوں میں شہادت کی خبروں کے بعد شروع ہونے والے بڑے پیمانے پر احتجاجی مظاہروں کے نتیجے میں پیدا ہوئی۔
نوٹیفکیشن فورس کمانڈر فورس کمانڈ ناردرن ایریاز کے نام جاری کیا گیا جس میں خدشہ ظاہر کیا گیا کہ ضلع گلگت اور ضلع اسکردو میں حالات مزید خراب ہو سکتے ہیں۔ انتظامیہ کے مطابق احتجاجی سرگرمیوں کے تسلسل سے جانی و مالی نقصان کا خطرہ ہے۔
حکومت نے دونوں اضلاع میں تین روز کے لیے دو، تین اور چار مارچ تک کرفیو نافذ کرنے اور پاک فوج کی تعیناتی کی درخواست کی ہے تاکہ کسی بھی ناخوشگوار واقعے کو روکا جا سکے اور انسانی جانوں اور املاک کا تحفظ یقینی بنایا جا سکے۔
نوٹیفکیشن کے مطابق کرفیو اور اس میں ممکنہ نرمی کے اوقات کا باقاعدہ شیڈول بھی جاری کر دیا گیا ہے تاکہ شہری ضروری امور انجام دے سکیں۔
حکام کا کہنا ہے کہ حساس علاقوں میں سیکیورٹی انتظامات سخت کر دیے گئے ہیں، اضافی چیک پوسٹس قائم کی گئی ہیں اور قانون نافذ کرنے والے اداروں کو ہائی الرٹ پر رکھا گیا ہے۔ شہریوں کو ہدایت کی گئی ہے کہ وہ کرفیو کے دوران گھروں میں رہیں اور امن و امان کی بحالی کے لیے انتظامیہ سے مکمل تعاون کریں۔
گلگت بلتستان حکومت نے واضح کیا ہے کہ یہ اقدامات عارضی نوعیت کے ہیں اور خطے میں امن و استحکام کی بحالی کے لیے ضروری ہیں۔
