اسپورٹس ڈیسک (ایم این این): دفاعی چیمپیئن بھارت کی قومی کرکٹ ٹیم نے سنسنی خیز مقابلے کے بعد انگلینڈ کی قومی کرکٹ ٹیم کو سات رنز سے شکست دے کر آئی سی سی مینز ٹی ٹوئنٹی ورلڈ کپ کے فائنل کے لیے کوالیفائی کر لیا۔
یہ میچ ممبئی کے وانکھیڈے اسٹیڈیم میں کھیلا گیا جہاں انگلینڈ کے کپتان ہیری بروک نے ٹاس جیت کر پہلے فیلڈنگ کرنے کا فیصلہ کیا۔
بھارت نے سنجو سیمسن کی جارحانہ اناسی رنز کی شاندار اننگز کی بدولت مقررہ اوورز میں سات وکٹوں کے نقصان پر دو سو ترپن رنز بنائے۔ جواب میں انگلینڈ کی ٹیم بھرپور مزاحمت کے باوجود سات وکٹوں کے نقصان پر دو سو چھیالیس رنز ہی بنا سکی اور یوں وہ ریکارڈ ہدف کے تعاقب میں کامیاب نہ ہو سکی۔
انگلینڈ کی ابتدائی وکٹیں جلد گر گئیں جب فل سالٹ پانچ، ہیری بروک سات اور جوس بٹلر پچیس رنز بنا کر پویلین لوٹ گئے۔ تاہم جیکب بیتھل نے ول جیکس کے ساتھ مل کر ٹیم کو مقابلے میں برقرار رکھنے کی کوشش کی۔
جیکب بیتھل نے اڑتالیس گیندوں پر سات چھکوں اور آٹھ چوکوں کی مدد سے جارحانہ اننگز کھیلی، تاہم وہ آخری اوور میں رن آؤٹ ہوگئے جس کے بعد بھارت نے چونتیس ہزار سے زائد تماشائیوں کے سامنے فتح کا جشن منایا۔
بھارت اب اتوار کو احمد آباد میں ہونے والے فائنل میں نیوزی لینڈ کی قومی کرکٹ ٹیم کا مقابلہ کرے گا۔ اگر بھارت یہ میچ جیت جاتا ہے تو وہ ٹی ٹوئنٹی ورلڈ کپ کا ٹائٹل مسلسل برقرار رکھنے والی پہلی ٹیم بن جائے گا اور پہلی مرتبہ اپنے ہوم گراؤنڈ پر یہ ٹرافی بھی اپنے نام کرے گا۔
اس سے قبل پہلے بیٹنگ کرتے ہوئے بھارتی بلے بازوں نے انگلینڈ کے بولرز کی خوب دھلائی کی اور پوری اننگز میں انیس چھکے اور اٹھارہ چوکے لگائے۔
سنجو سیمسن نے آغاز ہی میں جوفرا آرچر کے پہلے اوور میں ایک چوکا اور ایک چھکا لگا کر جارحانہ انداز کا اظہار کیا۔ انہیں پندرہ رنز پر اس وقت زندگی ملی جب ہیری بروک نے مڈ آف پر ایک آسان کیچ چھوڑ دیا۔
اس موقع سے فائدہ اٹھاتے ہوئے سنجو سیمسن نے صرف چھبیس گیندوں پر نصف سنچری مکمل کی جبکہ لیام ڈاسن کے ایک اوور میں انیس رنز بھی بٹورے۔
سنجو سیمسن نے ایشان کشن کے ساتھ دوسرے وکٹ کے لیے ستانوے رنز کی شراکت قائم کی۔ ایشان کشن دسویں اوور میں عادل رشید کی گیند پر ول جیکس کے ہاتھوں کیچ آؤٹ ہوگئے جس کے بعد بھارت کا اسکور ایک سو سترہ رنز پر دو وکٹیں ہوگیا۔
بعد ازاں سنجو سیمسن چودھویں اوور میں ول جیکس کی گیند پر فل سالٹ کے ہاتھوں کیچ آؤٹ ہوئے جب بھارت کا مجموعی اسکور ایک سو ساٹھ رنز تھا۔
شیوم دوبے نے پچیس گیندوں پر تینتالیس رنز بنائے جس میں چار چھکے شامل تھے، جبکہ ہاردک پانڈیا نے بارہ گیندوں پر ستائیس اور تلک ورما نے سات گیندوں پر اکیس رنز بنا کر ٹیم کا اسکور دو سو پچاس سے اوپر پہنچا دیا۔
انگلینڈ کی جانب سے ول جیکس دو وکٹوں کے ساتھ نمایاں بولر رہے جبکہ جوفرا آرچر کو اپنے چار اوورز میں اکسٹھ رنز دینا پڑے۔
