نیوز ڈیسک (ایم این این): سری لنکا نے جمعرات کو ایرانی بحریہ کے ایک جہاز سے 208 اہلکاروں کو محفوظ مقام پر منتقل کر دیا، ایک روز قبل امریکی آبدوز کے حملے میں ایران کا ایک اور جنگی جہاز تباہ ہو گیا تھا جس میں درجنوں ملاح ہلاک ہوئے تھے۔
سری لنکا کے صدر انورا کمارا ڈسانائیکے نے کہا کہ ایرانی بحری جہاز کے عملے کو احتیاطی اقدام کے طور پر نکالا گیا کیونکہ خدشہ ہے کہ یہ جہاز بھی حملے کا نشانہ بن سکتا ہے۔
انہوں نے بتایا کہ سری لنکن بحریہ اب ایرانی جہاز آئی آر آئی ایس بوشہر کو اپنی تحویل میں لے کر شمال مشرقی بندرگاہ ترینکومالی منتقل کرے گی تاکہ اسے محفوظ رکھا جا سکے۔ اس جہاز کے ایک انجن میں خرابی کی بھی اطلاع تھی۔
صدر ڈسانائیکے نے ٹیلی وژن خطاب میں کہا کہ ہم اس تنازع میں کسی فریق کا ساتھ نہیں دے رہے، تاہم غیر جانب دار رہتے ہوئے انسانی جانیں بچانے کے لیے اقدامات کر رہے ہیں۔
انہوں نے مزید کہا کہ جہاز پر موجود ایرانی عملے اور بحریہ کے کیڈٹس کو ان کی حفاظت کے لیے خشکی پر منتقل کر دیا جائے گا جبکہ سری لنکن بحریہ عارضی طور پر جہاز کو چلائے گی۔
یہ پیش رفت بدھ کے روز ہونے والے اس واقعے کے بعد سامنے آئی جب ایرانی فریگیٹ آئی آر آئی ایس دینا کو بین الاقوامی سمندری حدود میں امریکی آبدوز کے حملے میں نشانہ بنا کر تباہ کر دیا گیا تھا۔
بھارت میں ایران کے سفیر محمد فتح علی کے مطابق یہ جہاز غیر مسلح تھا اور بھارتی بندرگاہ وشاکھاپٹنم میں ہونے والی بحری مشقوں سے واپس لوٹ رہا تھا۔
ایران کے وزیر خارجہ عباس عراقچی نے اس حملے کی شدید مذمت کرتے ہوئے خبردار کیا کہ امریکہ کو اس اقدام پر “تلخ پشیمانی” کا سامنا کرنا پڑے گا۔
انہوں نے ایکس پر جاری بیان میں کہا کہ امریکہ نے ایران کے ساحل سے تقریباً دو ہزار میل دور سمندر میں سنگین کارروائی کی ہے۔ ان کے مطابق فریگیٹ دینا بھارت کی بحریہ کے مہمان کے طور پر تقریباً ایک سو تیس ملاحوں کے ساتھ بین الاقوامی پانیوں میں موجود تھا اور اسے بغیر کسی انتباہ کے نشانہ بنایا گیا۔
