اسلام آباد (ایم این این) – پاکستان محکمہ موسمیات نے اعلان کیا ہے کہ جمعرات 19 مارچ کی شام شوال 1447 ہجری کا چاند نظر آنے کے امکانات انتہائی کم ہیں۔
محکمہ موسمیات کے مطابق فلکیاتی تجزیے سے ظاہر ہوتا ہے کہ نیا چاند 19 مارچ کو صبح 06 بج کر 23 منٹ پر پیدا ہوگا۔
تاہم غروب آفتاب تک ملک کے بیشتر موسمیاتی مراکز میں چاند کی عمر تقریباً 12 سے 13 گھنٹے ہوگی جو کہ ننگی آنکھ سے ہلال دیکھنے کے لیے ناکافی سمجھی جاتی ہے۔
حکام کے مطابق اس کم مدت کی وجہ سے 29 رمضان کو شوال کا چاند نظر آنے کے امکانات نہ ہونے کے برابر ہیں۔
محکمہ موسمیات کا کہنا ہے کہ ان سائنسی اندازوں کے مطابق عیدالفطر کا امکان ہفتہ 21 مارچ کو ہے جب رمضان المبارک کے تیس روز مکمل ہوں گے۔
تاہم محکمہ موسمیات نے واضح کیا کہ یہ صرف فلکیاتی پیشگوئی ہے اور عید کے چاند کے حوالے سے حتمی اور سرکاری اعلان مرکزی رویت ہلال کمیٹی ہی کرے گی۔
