جنوبی وزیرستان (ایم این این): وانا کے علاقے رستم بازار میں ہفتہ کے روز ہونے والے بارودی دھماکے میں دو پولیس اہلکار شہید جبکہ پانچ پولیس اہلکاروں سمیت 31 افراد زخمی ہو گئے۔
پولیس حکام کے مطابق دھماکہ شام تقریباً پانچ بجے اس وقت ہوا جب پولیس اہلکار معمول کی گشت پر بازار میں موجود تھے۔ دھماکہ خیز مواد ایک سپر مارکیٹ کے مرکزی دروازے کے قریب نصب کیا گیا تھا جسے ریموٹ کنٹرول یا ٹائم ڈیوائس کے ذریعے اڑایا گیا۔
وانا سرکل کے ڈپٹی سپرنٹنڈنٹ آف پولیس (ڈی ایس پی) اصغر علی شاہ کے مطابق دھماکے کے نتیجے میں موقع پر موجود پولیس اہلکاروں اور شہریوں کو شدید نقصان پہنچا۔
واقعے کے فوراً بعد مقامی افراد، پولیس اور ریسکیو ٹیموں نے امدادی کارروائیاں شروع کر دیں اور زخمیوں کو ڈسٹرکٹ ہیڈکوارٹر اسپتال منتقل کیا گیا۔
اسپتال کے میڈیکل سپرنٹنڈنٹ ڈاکٹر جان محمد کے مطابق دو پولیس اہلکاروں کی لاشیں اسپتال لائی گئیں جبکہ زخمیوں میں پانچ دیگر پولیس اہلکار بھی شامل ہیں جن میں ایس ایچ او سیف اللہ، سب انسپکٹر علی محمد، سب انسپکٹر مزمل، اسسٹنٹ سب انسپکٹر مومن خان اور کانسٹیبل لال محمد شامل ہیں۔
انہوں نے بتایا کہ دھماکے میں 26 شہری بھی زخمی ہوئے جن میں بزرگ، بچے اور نوجوان شامل ہیں۔ متعدد زخمیوں کو فوری طبی امداد فراہم کی جا رہی ہے جبکہ اسپتال میں ایمرجنسی نافذ کر دی گئی ہے۔
ڈی ایس پی اصغر علی شاہ کے مطابق زخمیوں میں ایک ایڈیشنل ایس ایچ او بھی شامل ہیں جنہیں تشویشناک حالت میں جنوبی وزیرستان اسکاؤٹس اسپتال منتقل کر دیا گیا ہے۔
خیبر پختونخوا کے وزیر اعلیٰ سہیل آفریدی نے واقعے کی شدید مذمت کرتے ہوئے آئی جی پولیس سے تفصیلی رپورٹ طلب کر لی ہے۔ انہوں نے شہداء کے اہل خانہ سے تعزیت کا اظہار کیا اور کہا کہ صوبائی حکومت دکھ کی اس گھڑی میں ان کے ساتھ کھڑی ہے۔
وزیراعلیٰ نے زخمیوں کو بہترین طبی سہولیات فراہم کرنے کی بھی ہدایت کی اور کہا کہ دہشت گردوں کی ایسی بزدلانہ کارروائیاں عوام اور حکومت کے حوصلے پست نہیں کر سکتیں۔
یہ واقعہ ایک دن بعد پیش آیا جب شمالی وزیرستان میں بنوں–میران شاہ روڈ پر چشمہ سربندکی چیک پوسٹ کے قریب مشتبہ خودکش گاڑی حملے میں ایک شہری جاں بحق اور دو سیکیورٹی اہلکاروں سمیت 19 افراد زخمی ہو گئے تھے۔
