لکی مروت (ایم این این) – خیبر پختونخوا کے ضلع لکی مروت میں سکیورٹی فورسز نے خفیہ اطلاع پر کارروائی کرتے ہوئے پانچ دہشت گردوں کو ہلاک کر دیا۔
پاک فوج کے شعبہ تعلقات عامہ کی جانب سے جاری بیان کے مطابق یہ کارروائی دہشت گردوں کی موجودگی کی اطلاع پر کی گئی۔
بیان میں کہا گیا کہ کارروائی کے دوران سکیورٹی فورسز نے دہشت گردوں کے ٹھکانے کو مؤثر انداز میں نشانہ بنایا اور شدید فائرنگ کے تبادلے کے بعد پانچ دہشت گرد مارے گئے۔
فوج کے شعبہ تعلقات عامہ کے مطابق ہلاک دہشت گردوں کے قبضے سے اسلحہ اور گولہ بارود بھی برآمد ہوا ہے۔ بیان میں کہا گیا کہ یہ دہشت گرد علاقے میں مختلف دہشت گرد کارروائیوں میں ملوث تھے۔
بیان کے مطابق علاقے میں مزید دہشت گردوں کی موجودگی کے خدشے کے پیش نظر سرچ اور کلیئرنس آپریشن بھی جاری ہے تاکہ کسی بھی باقی رہ جانے والے دہشت گرد کو ختم کیا جا سکے۔
فوج کے مطابق پاکستان کی سکیورٹی فورسز اور قانون نافذ کرنے والے ادارے قومی ایکشن پلان کے تحت منظور کردہ عزم استحکام کے تحت دہشت گردی کے خاتمے کے لیے اپنی کارروائیاں پوری شدت کے ساتھ جاری رکھیں گے۔
بیان میں کہا گیا کہ اس مہم کا مقصد ملک سے بیرونی سرپرستی میں ہونے والی دہشت گردی کے خطرے کا مکمل خاتمہ کرنا ہے۔
واضح رہے کہ لکی مروت میں حالیہ دنوں کے دوران دہشت گردوں کے خلاف کئی کارروائیاں کی گئی ہیں۔
دو روز قبل محکمہ انسداد دہشت گردی نے بھی خفیہ اطلاع پر کارروائی کرتے ہوئے چھ دہشت گردوں کو ہلاک کیا تھا۔
اس سے پہلے بدھ کے روز سکیورٹی فورسز نے اسی ضلع میں ایک اور کارروائی کے دوران چار دہشت گردوں کو مار گرایا تھا۔
