نیوز ڈیسک (ایم این این) – امریکی محکمہ خارجہ نے متحدہ عرب امارات، کویت اور اردن کے لیے 16.5 ارب ڈالر کے اسلحہ معاہدے کی منظوری دے دی ہے، جبکہ ایران کے ساتھ کشیدگی میں مسلسل اضافہ ہو رہا ہے۔
اس معاہدے کے تحت متحدہ عرب امارات کو 8.4 ارب ڈالر کے ہتھیار فراہم کیے جائیں گے جن میں ڈرونز، میزائل، ریڈار سسٹمز اور ایف 16 لڑاکا طیارہ شامل ہیں۔
کویت کو تقریباً 8 ارب ڈالر کے دفاعی ریڈار سسٹمز جبکہ اردن کو 70.5 ملین ڈالر کی فوجی معاونت فراہم کی جائے گی۔
مارکو روبیو نے ہنگامی صورتحال کا جواز پیش کرتے ہوئے اس معاہدے کی فوری منظوری دی، جس کے لیے کانگریس کی منظوری درکار نہیں رہی۔
یہ اقدام ایسے وقت میں سامنے آیا ہے جب ڈونلڈ ٹرمپ کی قیادت میں امریکہ نے اسرائیل کے ساتھ مل کر ایران پر حملے کیے، جس کے بعد خطے میں کشیدگی بڑھ گئی۔
ایران نے آبنائے ہرمز میں جہاز رانی کو متاثر کیا جس سے عالمی سطح پر تیل اور گیس کی فراہمی متاثر ہوئی۔
امریکہ میں پٹرول کی قیمتوں میں بھی اضافہ دیکھا گیا، جبکہ عالمی توانائی منڈی دباؤ کا شکار ہے۔
اس معاہدے میں آر ٹی ایکس کارپوریشن، نارتھروپ گرومین اور لاک ہیڈ مارٹن شامل ہیں۔
دوسری جانب امریکی محکمہ دفاع نے جنگی اخراجات کے لیے مزید 200 ارب ڈالر کی درخواست بھی دی ہے۔
وزیر دفاع پیٹ ہیگسیتھ نے کہا کہ بدلتے عالمی حالات کے پیش نظر دفاعی اخراجات میں اضافہ ضروری ہے۔
انہوں نے کہا کہ دنیا ایک غیر مستحکم مرحلے میں داخل ہو چکی ہے اور اس کے لیے اضافی وسائل درکار ہیں۔
