اسپورٹس ڈیسک (ایم این این) – ہسپانوی ماڈل اور سوشل میڈیا شخصیت جارجینا روڈریگز نے اپنی نئی انسٹاگرام پوسٹ کے بعد سوشل میڈیا پر دھوم مچا دی، جس میں وہ پرتگالی فٹبال اسٹار کرسٹیانو رونالڈو کے ساتھ نظر آ رہی ہیں اور قیمتی لگژری اشیاء کی نمائش کر رہی ہیں۔
تصویر میں دونوں ایک نایاب بگاٹی گاڑی کے ساتھ کھڑے ہیں، جس کی قیمت کروڑوں ڈالر تک جا سکتی ہے، جبکہ دونوں نے مہنگی گھڑیاں بھی پہن رکھی ہیں۔
تاہم مداحوں کی سب سے زیادہ توجہ جارجینا کی ہیروں سے جڑی منگنی کی انگوٹھی نے حاصل کی، جو پہلی بار اگست 2025 میں ان کی منگنی کے اعلان کے وقت سامنے آئی تھی۔
بی اِن اسپورٹس کے مطابق اس انگوٹھی کی مالیت تقریباً 10.9 ملین سے 13 ملین ڈالر کے درمیان بتائی جاتی ہے، جبکہ سوشل میڈیا صارفین کے مطابق تصویر میں موجود تمام اشیاء کی مجموعی قیمت 20 ملین ڈالر سے بھی زائد ہو سکتی ہے۔
یہ تصویر تیزی سے وائرل ہو گئی اور مختلف سوشل میڈیا پلیٹ فارمز پر زیر بحث آ گئی، جہاں صارفین نے دکھائی جانے والی دولت پر تبصرے کیے۔
جارجینا، جن کے انسٹاگرام پر 72 ملین سے زائد فالوورز ہیں، اکثر اپنی ذاتی زندگی اور لگژری طرز زندگی کی جھلکیاں شیئر کرتی رہتی ہیں۔
