اسپورٹس ڈیسک (ایم این این) – ایچ بی ایل پاکستان سپر لیگ کے گیارہویں ایڈیشن کے لیے آفیشل ترانہ “کھیلیں گے بیٹ پہ” جاری کر دیا گیا ہے، جو لیگ کے نئے دور کے آغاز کی علامت ہے۔
یہ ترانہ گزشتہ دس برسوں کے سفر کو اجاگر کرتا ہے اور پہلی بار آٹھ ٹیموں تک لیگ کی توسیع کو نمایاں کرتا ہے۔ پاکستان کرکٹ بورڈ کے مطابق یہ گانا ملک بھر کے کرکٹ شائقین کے جذبات اور لگاؤ کی عکاسی کرتا ہے۔
“کھیلیں گے بیٹ پہ” اس ٹورنامنٹ کو ایک ایسی قوت کے طور پر پیش کرتا ہے جو پوری نسل کو جوڑتی ہے اور پاکستان میں کرکٹ سے محبت کو اجاگر کرتی ہے، جو آج بھی لاکھوں دلوں پر راج کر رہی ہے۔
2016 سے ہر سال پی ایس ایل ملک کو ایک عالمی معیار کے کرکٹ میلے کے ذریعے متحد کرتی آ رہی ہے۔
اس ترانے میں معروف گلوکار عاطف اسلم مرکزی حیثیت رکھتے ہیں، جبکہ صابری سسٹرز (انعم اور ثمن)، ایما بیگ اور ابھرتی ہوئی ریپ آرٹسٹ دانیا کنول بھی شامل ہیں۔
عاطف اسلم دوسری بار پی ایس ایل ترانے کا حصہ بنے ہیں، جبکہ ایما بیگ چوتھی بار اس ایونٹ میں اپنی آواز کا جادو جگا رہی ہیں۔
