اسلام آباد (ایم این این) – اسلام آباد کے علاقے آرچرڈ اسکیم میں پیر کی علی الصبح فارم ہاؤس پر مبینہ ڈکیتی کے دوران فائرنگ سے معروف تاجر عامر اعوان جاں بحق ہو گئے۔
پولیس کے مطابق پانچ مسلح افراد، جو سب مشین گنوں سے لیس اور بلٹ پروف جیکٹس پہنے ہوئے تھے، فارم ہاؤس میں داخل ہوئے۔ سی سی ٹی وی فوٹیج سے بھی اس بات کی تصدیق ہوئی ہے۔ ابتدائی شواہد کے مطابق مقتول نے مزاحمت کی۔
زخمی ہونے کے بعد عامر اعوان کو پہلے سرکاری اسپتال منتقل کیا گیا، بعد ازاں انہیں نجی اسپتال لے جایا گیا جہاں وہ آپریشن کے دوران دم توڑ گئے۔
مقتول آبپارہ میں کار شوروم کے مالک تھے جبکہ جائے وقوعہ ایک ایسا علاقہ ہے جہاں بااثر شخصیات اور اعلیٰ حکومتی شخصیات کی جائیدادیں موجود ہیں۔
واقعے کا مقدمہ تھانہ شہزاد ٹاؤن میں مقتول کی اہلیہ عائشہ اعوان کی مدعیت میں درج کر لیا گیا ہے۔
ایف آئی آر کے مطابق عائشہ اعوان رات تقریباً پونے تین بجے شور کی آواز سن کر بیدار ہوئیں اور دیکھا کہ ان کے شوہر تین مسلح افراد سے الجھ رہے ہیں جبکہ دو افراد کھڑکی کے باہر موجود تھے۔ اس وقت ان کے دونوں بیٹے اپنے کمروں میں سو رہے تھے۔
انہوں نے بتایا کہ شور مچانے پر ملزمان نے جان سے مارنے کی نیت سے فائرنگ شروع کر دی، جس کے نتیجے میں ان کے شوہر کے پیٹ میں گولی لگی اور وہ زمین پر گر گئے۔
شور سن کر ان کے بیٹے بھی کمرے میں آ گئے جس پر ملزمان کھڑکی کے راستے فرار ہو گئے۔ گھر کے دو سیکیورٹی گارڈز کے مطابق ڈاکو ان کے موبائل فون اور نقدی بھی لے گئے جبکہ ایک گارڈ کو کمرے میں بند کر دیا گیا تھا۔
