اسپورٹس ڈیسک (ایم این این): دو ہزار چھبیس کا فیفا عالمی کپ، جس کی میزبانی ریاستہائے متحدہ امریکا، میکسیکو اور کینیڈا مشترکہ طور پر کریں گے، کے لیے متعدد ٹیمیں کوالیفائی کر چکی ہیں۔
اہم ٹیموں میں ارجنٹینا، برازیل، جرمنی، فرانس اور انگلینڈ شامل ہیں، جبکہ ازبکستان، اردن اور کیپ وردے جیسی ٹیمیں پہلی بار عالمی کپ میں شرکت کریں گی۔
ایشیائی ٹیموں میں جاپان، جنوبی کوریا، آسٹریلیا، سعودی عرب، عراق اور ایران شامل ہیں، جبکہ افریقی ٹیموں میں مراکش، سینیگال، گھانا اور مصر نے بھی جگہ بنا لی ہے۔
ایران کی شرکت کچھ عرصہ تک تنازع کا شکار رہی کیونکہ اس کے میچ امریکا میں شیڈول تھے اور دونوں ممالک کے درمیان کشیدگی پائی جاتی ہے۔ ایرانی حکام نے سکیورٹی اور ویزا مسائل کے باعث فیفا سے درخواست کی تھی کہ میچز کو میکسیکو یا کینیڈا منتقل کیا جائے، تاہم فیفا نے یہ درخواست مسترد کرتے ہوئے اعلان کیا کہ تمام میچز طے شدہ شیڈول کے مطابق امریکا میں ہی ہوں گے۔
بعد ازاں یہ تنازع بڑی حد تک ختم ہو گیا اور ایران نے اپنی تشویش کے باوجود عالمی کپ میں شرکت جاری رکھنے کا فیصلہ کر لیا ہے۔ فیفا حکام نے تمام ٹیموں کو مکمل سکیورٹی فراہم کرنے کی یقین دہانی بھی کرائی ہے۔
دو ہزار چھبیس کے عالمی کپ میں اڑتالیس ٹیموں کی شمولیت سے ٹورنامنٹ کا دائرہ کار مزید وسیع ہو گیا ہے اور دنیا بھر سے زیادہ ٹیموں کو شرکت کا موقع ملا ہے۔
