دبئی (ایم این این) – جاپان سے منسلک ایک ایل این جی ٹینکر نے ایران جنگ کے آغاز کے بعد پہلی بار آبنائے ہرمز عبور کر لی، جس کی تصدیق اس کے شریک مالک مٹسوی او ایس کے لائنز نے کی ہے۔
پاناما کے جھنڈے تلے چلنے والا جہاز “سوہر ایل این جی” بحفاظت گزر گیا جبکہ تمام عملہ محفوظ رہا۔ کمپنی نے عبور کے وقت یا کسی ممکنہ مذاکرات کی تفصیلات ظاہر نہیں کیں۔
آبنائے ہرمز، جو عالمی توانائی ترسیل کے لیے نہایت اہم راستہ ہے، فروری کے آخر میں ایران پر امریکی و اسرائیلی حملوں کے بعد عملاً بند ہو گئی تھی۔ اس سے قبل دنیا کی تقریباً 20 فیصد تیل اور ایل این جی سپلائی اسی راستے سے گزرتی تھی۔
جاپان اس صورتحال سے خاص طور پر متاثر ہوا کیونکہ اس کی تقریباً 90 فیصد تیل اور 6 فیصد ایل این جی درآمدات اسی راستے سے ہوتی ہیں۔
جاپان کی وزارت ٹرانسپورٹ کے مطابق جمعہ تک تقریباً 45 جاپانی جہاز اس راستے کے باعث پھنسے ہوئے تھے جن میں تیل بردار جہاز، کیمیکل ٹینکرز، گاڑیوں کے جہاز اور ایل این جی ٹینکر شامل ہیں۔
اس سے قبل مٹسوی او ایس کے لائنز کے ایک جہاز کو معمولی نقصان بھی پہنچا تھا تاہم کوئی جانی نقصان نہیں ہوا۔
دریں اثنا فرانسیسی شپنگ کمپنی سی ایم اے سی جی ایم کا ایک جہاز بھی حال ہی میں آبنائے ہرمز سے گزر چکا ہے جبکہ چین، بھارت اور یونان سے تعلق رکھنے والے جہاز بھی جنگ کے بعد اس راستے کو عبور کر چکے ہیں۔
