اسلام آباد (ایم این این): پاکستان نے جون تک واجب الادا 4.75 ارب ڈالر کے بیرونی قرضوں کی ادائیگی کیلئے متبادل مالی انتظام کر لیا ہے، جس کا مقصد بروقت ادائیگی اور مالی ساکھ کو برقرار رکھنا ہے۔
رپورٹس کے مطابق ان ادائیگیوں میں متحدہ عرب امارات کے 3.45 ارب ڈالر شامل ہیں، جو تین اقساط میں ادا کیے جائیں گے۔ ان میں 11 اپریل کو 450 ملین ڈالر، 17 اپریل کو 2 ارب ڈالر اور 23 اپریل کو 1 ارب ڈالر شامل ہیں۔
اس کے علاوہ پاکستان کے 10 سالہ یورو بانڈز کی مد میں 1.3 ارب ڈالر 8 اپریل کو واجب الادا ہیں، جن کی ادائیگی کیلئے بھی انتظامات مکمل کر لیے گئے ہیں۔
حکام کے مطابق دوست ممالک سے 5 ارب ڈالر سے زائد کی مالی یقین دہانیاں حاصل کی گئی ہیں تاکہ ان ادائیگیوں میں سہولت فراہم کی جا سکے۔
اسٹیٹ بینک کے پاس زرمبادلہ کے ذخائر تقریباً 16.4 ارب ڈالر ہیں، جو حکام کے مطابق آئندہ ادائیگیوں کیلئے کافی ہیں اور بیرونی کھاتوں پر دباؤ نہیں پڑے گا۔
حکام کا کہنا ہے کہ بروقت ادائیگیاں سرمایہ کاروں کے اعتماد کو برقرار رکھنے اور معیشت کے استحکام میں مددگار ثابت ہوں گی۔
