پنجاب اسمبلی میں اپوزیشن جماعت پاکستان تحریک انصاف (پی ٹی آئی) کے ارکان نے لاہور ہائیکورٹ میں درخواست دائر کر دی ہے جس میں پنجاب لوکل گورنمنٹ ایکٹ 2025 کی متعدد شقوں کو آئین سے متصادم قرار دیا
یہ درخواست اپوزیشن لیڈر محمد معین الدین ریاض، حافظ فرحت عباس اور علی امتیاز کی جانب سے دائر کی گئی ہے، جس میں مؤقف اختیار کیا گیا ہے کہ ایکٹ کی دفعات 15، 25، 32، 40، 55، 56 اور 57 آئین کے آرٹیکل 8، 9، 17، 32 اور 140-A کی خلاف ورزی کرتی ہیں۔
درخواست گزاروں کے مطابق نیا قانون منتخب نمائندوں کے اختیارات محدود کرنے، سیاسی سرگرمیوں کو کمزور کرنے اور جماعتی سیاست کو ختم کرنے کی کوشش ہے۔
درخواست میں کہا گیا ہے کہ غیر جماعتی بنیادوں پر بلدیاتی انتخابات کرانا عوام کے سیاسی حق کو سلب کرنے کے مترادف ہے، جو جمہوری اقدار اور بنیادی انسانی حقوق کے خلاف ہے۔
پی ٹی آئی رہنماؤں نے عدالت سے استدعا کی ہے کہ جب تک کیس کا فیصلہ نہیں ہو جاتا، ان شقوں پر عمل درآمد معطل کیا جائے۔
یہ قانون 13 اکتوبر کو پنجاب اسمبلی سے اپوزیشن کے شدید احتجاج کے باوجود منظور کیا گیا تھا۔
انتخابی کمیشن نے پہلے اعلان کیا تھا کہ بلدیاتی انتخابات دسمبر میں پرانے ایکٹ 2022 کے تحت ہوں گے، تاہم نئے قانون کے بعد یہ انتخابات آئندہ سال تک ملتوی کر دیے گئے۔
پی ٹی آئی نے غیر جماعتی بلدیاتی نظام اور انتظامی افسران کو دیے گئے اختیارات پر سخت اعتراضات اٹھائے ہیں۔
جماعت نے مطالبہ کیا ہے کہ یونین کونسل چیئرمینوں کے براہِ راست انتخابات بحال کیے جائیں، پانچ سالہ مدت متعین کی جائے اور حکومتی مداخلت کو محدود کیا جائے۔
