ڈیرہ اسماعیل خان کی تحصیل درابن میں منگل کے روز سیکیورٹی فورسز کے قافلے پر بم حملے میں کم از کم 14 اہلکار زخمی ہو گئے۔
سیکیورٹی ذرائع کے مطابق، حملہ ایک ریموٹ کنٹرولڈ بم (IED) کے ذریعے کیا گیا جو سیکیورٹی فورسز کے قافلے کو نشانہ بنانے کے لیے سڑک کے کنارے نصب کیا گیا تھا۔ دھماکے سے ایک گاڑی بری طرح متاثر ہوئی، جبکہ زخمی اہلکاروں کو فوری طور پر سی ایم ایچ ڈی آئی خان منتقل کر دیا گیا۔ تین اہلکاروں کی حالت تشویشناک بتائی جا رہی ہے۔
یہ حملہ اس وقت ہوا جب سیکیورٹی فورسز جنوبی وزیرستان کے علاقے وانا میں واقع کیڈٹ کالج میں موجود دہشت گردوں کے خلاف کلیئرنس آپریشن میں مصروف ہیں۔
دھماکے کے بعد پولیس اور سیکیورٹی فورسز کی بھاری نفری موقع پر پہنچی، علاقے کو گھیرے میں لے کر سرچ آپریشن شروع کر دیا گیا۔
دوسری جانب خیبر پختونخوا پولیس نے بنوں کے احمدزئی پولیس اسٹیشن پر ہونے والا حملہ ناکام بنا دیا۔
پولیس کے مطابق، دہشت گردوں نے چھوٹے اور بڑے ہتھیاروں سے حملے کی کوشش کی لیکن اہلکاروں کی بروقت اور مؤثر جوابی کارروائی سے حملہ ناکام ہو گیا۔ پولیس نے بتایا کہ جوابی فائرنگ میں متعدد دہشت گرد ہلاک یا زخمی ہوئے اور ان کے ساتھی لاشیں اپنے ساتھ لے گئے۔
آئی جی پولیس ذوالفقار حمید نے پولیس اہلکاروں کی بہادری کو سراہتے ہوئے نقد انعام اور تعریفی اسناد دینے کا اعلان کیا۔
گزشتہ روز بھی سیکیورٹی فورسز نے خیبر پختونخوا کے مختلف اضلاع میں کارروائیوں کے دوران 20 دہشت گردوں کو ہلاک کیا تھا۔ ملک میں گزشتہ ایک سال کے دوران دہشت گردی کی کارروائیوں میں نمایاں اضافہ دیکھنے میں آیا ہے، خاص طور پر خیبر پختونخوا اور بلوچستان میں، جب سے ٹی ٹی پی نے نومبر 2022 میں حکومت سے جنگ بندی ختم کرنے کا اعلان کیا۔
