وفاقی وزیرِ دفاع خواجہ آصف نے منگل کے روز کہا ہے کہ اسلام آباد اور خیبر پختونخوا میں دہشت گرد حملوں کے بعد پاکستان افغان سرزمین پر موجود دہشت گرد ٹھکانوں کو نشانہ بنا سکتا ہے۔
اسلام آباد کی ضلعی عدالت کے قریب خودکش دھماکے میں کم از کم 12 افراد جاں بحق اور 36 زخمی ہوئے۔ یہ واقعہ اُس وقت پیش آیا جب دارالحکومت میں بین الاقوامی تقریبات، بشمول پارلیمانی اسپیکرز کانفرنس اور مرگلہ ڈائیلاگ، جاری تھیں جبکہ راولپنڈی میں پاکستان اور سری لنکا کا ایک روزہ میچ بھی کھیلا جا رہا تھا۔
ادھر جنوبی وزیرستان کے کڈٹ کالج وانا میں چھپے دہشت گردوں کے خلاف سیکیورٹی فورسز کا کلیئرنس آپریشن جاری ہے۔
جیو نیوز کے پروگرام آج شاہزیب خانزادہ کے ساتھ میں گفتگو کرتے ہوئے خواجہ آصف نے کہا کہ آج کے حملوں کے بعد پاکستان ’’مجبور ہو گیا ہے‘‘ کہ کارروائی کرے۔ ان سے جب پوچھا گیا کہ کیا پاکستان جوابی کارروائی کرے گا تو انہوں نے کہا، ’’ان شاء اللہ‘‘ اور واضح کیا کہ افغانستان میں دہشت گردوں کے ٹھکانوں پر حملے ’’ممکن ہیں‘‘۔
انہوں نے کہا کہ پاکستان کو اب یہ وہم نہیں رکھنا چاہیے کہ افغان طالبان پاکستان کے خیرخواہ ہیں۔ ’’کابل میں کوئی متحدہ حکومت نہیں، مختلف دھڑے اپنے اپنے مفادات کے لیے سرگرم ہیں،‘‘ انہوں نے کہا۔
خواجہ آصف نے الزام لگایا کہ کچھ افغان گروہ بھارت سے منسلک ہیں جو افغانستان کے راستے پاکستان میں دہشت گردی کو فروغ دے رہے ہیں۔ ’’یہ واقعات دراصل بھارت کی پاکستان کے خلاف بالواسطہ جارحیت کا پیش خیمہ ہیں،‘‘ ان کا کہنا تھا۔
وزیر دفاع نے بتایا کہ گزشتہ ایک سال میں افغانستان سے تقریباً 2,500 سے 3,000 دہشت گرد پاکستان میں داخل ہوئے، جو مختلف علاقوں میں چھپے ہوئے ہیں۔ ’’حالیہ کارروائیوں میں مارے جانے والے دہشت گردوں میں 55 فیصد افغان شہری تھے،‘‘ انہوں نے انکشاف کیا۔
انہوں نے کہا کہ پاکستان اب افغان حکومت کے زبانی وعدوں پر بھروسہ نہیں کر سکتا۔ ’’افغانستان میں خود ان کے وعدوں پر کوئی یقین نہیں کرتا،‘‘ انہوں نے کہا، اور بتایا کہ پاکستانی فورسز بعض اوقات دہشت گردوں کا تعاقب افغان علاقے تک کرتی ہیں، جسے اب مزید بڑھایا جائے گا۔
خواجہ آصف نے نئی دہلی دھماکے پر ردعمل دیتے ہوئے کہا کہ بھارت جلد ہی پاکستان پر الزام لگا سکتا ہے۔ تاہم انہوں نے کہا کہ پاکستان کسی جنگ کا خواہاں نہیں بلکہ اپنی معیشت کی بحالی پر توجہ دے رہا ہے۔ ’’ہم کسی جارحیت کا آغاز نہیں کریں گے، لیکن اگر ہم پر حملہ ہوا تو جواب ضرور دیں گے۔‘‘
انہوں نے یہ بھی کہا کہ بھارتی ریاست بہار کے انتخابات سے قبل کوئی ’’جعلی ڈرامہ‘‘ رچایا جا سکتا ہے، تاہم پاکستان مکمل الرٹ پر ہے اور کسی بھی جارحیت کا مؤثر جواب دیا جائے گا۔
