لاہور (ایم این این)۔ الیکشن کمیشن کے مطابق تحریک انصاف نے لاہور سے سینیٹ کی خالی نشست کے لیے نہ تو کوئی امیدوار نامزد کیا اور نہ ہی کاغذاتِ نامزدگی جمع کرائے۔
ادھر مسلم لیگ ن کے امیدوار عابد شیر علی کے کاغذاتِ نامزدگی کی اسکروٹنی مکمل ہونے کے بعد دیگر دو امیدوار، احسن افضل اور عبدالجبار، اپنے کاغذات واپس لے چکے ہیں۔ سینیٹر عرفان صدیقی کی خالی ہونے والی نشست کے لیے عابد شیر علی نے کاغذات جمع کرائے تھے، جن کے تجویز کنندہ رانا ارشد اور راحیلہ خادم حسین تھے، جبکہ تائید کنندگان میں رانا شہریار اور طاہر جمیل شامل تھے۔
کاغذات کی واپسی کے بعد عابد شیر علی کو بلامقابلہ کامیاب قرار دے دیا گیا، جس کے بعد وہ باضابطہ طور پر سینیٹ کے رکن منتخب ہوگئے ہیں۔
وزیر اعظم محمد شہباز شریف نے عابد شیر علی کو کامیابی پر مبارکباد دیتے ہوئے کہا کہ مسلم لیگ ن کو عوامی خدمت کی بدولت ہر میدان میں کامیابیاں مل رہی ہیں۔ وزیراعظم کے مطابق عابد شیر علی جماعت کے سرگرم رہنما ہیں اور سابقہ ادوار میں عوامی خدمت سے اپنی منفرد شناخت قائم کر چکے ہیں۔
وزیراعظم نے امید ظاہر کی کہ سینیٹر کی حیثیت سے عابد شیر علی قائد میاں محمد نواز شریف کی رہنمائی میں قومی ترقی اور عوامی فلاح کے لیے بھرپور کردار ادا کریں گے۔
عابد شیر علی کی بلا مقابلہ کامیابی سے سینیٹ کا ایوان مزید مضبوط ہوا ہے اور ایوان میں نمائندگی کا ایک نیا اضافہ ہوا ہے۔
