اسلام آباد (ایم این این) – چیف آف ڈیفنس فورسز اور آرمی چیف فیلڈ مارشل سید عاصم منیر نے بدھ کے روز کہا کہ دہشت گردی ’’بھارت کی پہچان‘‘ ہے، جبکہ پاکستان اپنے دشمنوں کا ڈٹ کر اور کھلے عام مقابلہ کرتا ہے۔
انہوں نے نیشنل علما و مشائخ کانفرنس سے خطاب میں کہا کہ ’’دہشت گردی پاکستان کا طریقہ نہیں، بھارت کا ہے‘‘۔
فیلڈ مارشل منیر نے کہا کہ پاکستان پس پردہ کام نہیں کرتا بلکہ اپنی مشکلات کا سامنے سے مقابلہ کرتا ہے۔ ان کا کہنا تھا کہ ’’ریاستِ طیبہ‘‘ اور پاکستان کے درمیان گہرا نظریاتی رشتہ موجود ہے، اور قوم کی اصل طاقت اتحاد، علم اور محنت سے آتی ہے۔
انہوں نے پاک–سعودی دفاعی معاہدے کو ’’تاریخی‘‘ قرار دیتے ہوئے کہا کہ اللہ نے پاکستان کو حرمین کی حفاظت کا اعزاز بخشا ہے، جو کسی اور مسلم ملک کے پاس نہیں۔
انہوں نے کہا کہ علم و تحقیق سے دوری معاشروں کو انتشار کا شکار کرتی ہے، جبکہ نظم و ضبط اور سیکھنے کا عمل ترقی کی بنیاد ہیں۔ ان کا کہنا تھا کہ اسلامی ریاست میں جہاد کا اعلان صرف ریاست ہی کر سکتی ہے، کوئی فرد یا گروہ نہیں۔
فیلڈ مارشل نے علما سے اپیل کی کہ وہ قوم میں اتحاد پیدا کریں، عوام کی سوچ کو وسعت دیں اور نوجوانوں کی راہنمائی میں اپنا کردار مزید مضبوط کریں۔
اس سے پہلے وزیر اعظم شہباز شریف نے اپنے خطاب میں کہا کہ پاکستان دیرپا معاشی ترقی اس وقت تک حاصل نہیں کر سکتا جب تک دہشت گردی، انتہاپسندی اور فرقہ واریت کا مکمل خاتمہ نہ ہو۔
انہوں نے علما سے اپیل کی کہ تمام مکاتبِ فکر میں ہم آہنگی اور بھائی چارہ فروغ دیں، کیونکہ قومی یکجہتی ملک کے روشن مستقبل کیلئے ناگزیر ہے۔
وزیر اعظم نے کہا کہ بھارت کے خلاف ’’معرکۂ حق‘‘ میں کامیابی مسلح افواج کی پیشہ ورانہ مہارت اور قوم کی دعاؤں کا نتیجہ ہے۔ انہوں نے فیلڈ مارشل عاصم منیر کی قیادت اور پاک فوج، پاک فضائیہ اور پاک بحریہ کے کردار کو سراہا۔
انہوں نے کہا کہ دنیا پاکستان کی کارکردگی کو تسلیم کر رہی ہے، اگرچہ کچھ عناصر اب بھی افواجِ پاکستان کے خلاف پروپیگنڈا کر رہے ہیں۔
شہباز شریف نے کہا کہ پاکستان معاشی ترقی کی نئی بلندیوں کی طرف بڑھنے والا ہے، اور سیاسی و عسکری قیادت نے ملک کو ڈیفالٹ کے خطرے سے نکالا۔
انہوں نے محنت، کفایت شعاری اور اجتماعی کوششوں کے ذریعے قائداعظم کے خواب کی تکمیل کا عزم دہراتے ہوئے کہا کہ ملک میں دیرپا ترقی اور استحکام کیلئے قومی اتحاد ضروری ہے۔
