اسلام آباد (ایم این این) — وزیرِ اعظم شہباز شریف کی جانب سے اسلام آباد ایکسپریس وے کو جی ٹی روڈ سے ملانے والے ٹی جنکشن فلائی اوور کا افتتاح تو ٹریفک کی روانی بہتر بنانے کے دعوے کے ساتھ کیا گیا، تاہم منصوبے کے پہلے ہی دن اس کے ڈیزائن میں ایک بڑی خامی سامنے آ گئی۔
فلائی اوور پر ایکسپریس وے سے آنے والی ٹریفک کو راولپنڈی کی جانب جانے کے لیے براہِ راست راستہ فراہم نہیں کیا گیا۔ نتیجتاً مسافروں کو پہلے لاہور کی سمت جانا پڑ رہا ہے اور پھر ایک کلومیٹر سے زائد فاصلہ طے کرنے کے بعد یوٹرن لے کر واپس راولپنڈی آنا پڑتا ہے۔
افتتاح کے پہلے ہی دن ایکسپریس وے سے اقبال فلائی اوور کی طرف آنے والے شہری راولپنڈی جانے کا سیدھا راستہ تلاش کرتے رہے، مگر ناکام رہے۔ اسی طرح دائیں جانب مڑنے والی ٹریفک اسلام آباد کی سمت چلی گئی، جبکہ راولپنڈی جانے والی گاڑیوں کو راوت کے قریب ایک اور یوٹرن لینا پڑا، جس سے وہی پرانا ٹریفک انتشار دوبارہ دیکھنے میں آیا۔
محسن نقوی نے دعویٰ کیا کہ یہ منصوبہ ریکارڈ 77 دن میں مکمل کیا گیا اور اس پر تقریباً ایک ارب 20 کروڑ روپے لاگت آئی، جو دیگر شہروں کے منصوبوں کے مقابلے میں کم ہے۔ انہوں نے سی ڈی اے اور منصوبہ ٹیم کی کارکردگی کو سراہا اور بتایا کہ ایک سول انجینئر مسلسل دن رات سائٹ پر موجود رہا۔
وزیرِ داخلہ نے اسلام آباد کی آئندہ دو سالہ ترقی کے لیے وژن 2027 پروگرام کا بھی اعلان کیا، جس کے تحت سڑکوں، قبرستانوں، ہوٹلوں اور تفریحی سہولیات سمیت تقریباً 130 منصوبے متعارف کرائے جائیں گے۔
تاہم شہریوں کا کہنا ہے کہ اگر فلائی اوور کے بنیادی ڈیزائن میں ہی خامی ہو تو ریکارڈ مدت اور کم لاگت کے دعوے بے معنی ہو جاتے ہیں، اور ٹریفک مسائل کم ہونے کے بجائے مزید پیچیدہ ہو سکتے ہیں۔
