اسلام آباد (ایم این این): پاکستان اور متحدہ عرب امارات کے درمیان جمعہ کے روز اعلیٰ سطحی اور بامعنی مذاکرات ہوئے جن کا مقصد دونوں ممالک کے دیرینہ برادرانہ تعلقات کو مزید مضبوط بنانا تھا۔ یہ بات صدرِ امارات شیخ محمد بن زاید النہیان کے پاکستان کے پہلے سرکاری دورے کے اختتام پر جاری بیان میں کہی گئی۔
اگرچہ رواں برس یہ صدرِ امارات کا پاکستان کا دوسرا دورہ ہے، تاہم دفتر خارجہ کے مطابق یہ ان کا صدر کی حیثیت سے پہلا باضابطہ دورہ تھا۔
مشترکہ بیان کے مطابق دونوں ممالک نے باہمی دلچسپی کے امور پر قریبی مشاورت جاری رکھنے کے عزم کا اعادہ کیا اور اہم علاقائی و عالمی پیش رفت پر تبادلہ خیال کیا۔
بیان میں کہا گیا کہ دونوں قیادتوں نے دوطرفہ تعلقات میں مثبت پیش رفت پر اطمینان کا اظہار کرتے ہوئے امن، استحکام اور پائیدار ترقی کے مشترکہ اہداف کے لیے مل کر کام جاری رکھنے کے عزم کو دہرایا۔
بیان کے مطابق صدر شیخ محمد بن زاید کا دورہ پاکستان اور متحدہ عرب امارات کے درمیان گہرے برادرانہ تعلقات کو مزید مستحکم کرنے اور اسٹریٹجک شراکت داری کو فروغ دینے میں مددگار ثابت ہوگا۔
وزیراعظم شہباز شریف اور صدرِ امارات کے درمیان ہونے والی ملاقات میں اقتصادی تعاون، سرمایہ کاری، توانائی، انفراسٹرکچر کی ترقی، آئی ٹی، ٹیکنالوجی اور عوامی روابط کے فروغ پر بھی گفتگو ہوئی۔
دونوں رہنماؤں نے دوطرفہ تجارت بڑھانے کی ضرورت پر اتفاق کیا اور اسے باہمی فائدے کے لیے بھرپور صلاحیت کا حامل قرار دیا۔
بیان کے مطابق صدرِ امارات کا شاندار اور پرتپاک استقبال کیا گیا اور پاکستانی فضائی حدود میں داخلے پر پاک فضائیہ کے جے ایف 17 طیاروں نے صدارتی طیارے کو حفاظتی حصار فراہم کیا۔
اس سے قبل صدر شیخ محمد بن زاید اسلام آباد پہنچے، جہاں نور خان ایئربیس پر وزیراعظم شہباز شریف نے ان کا استقبال کیا۔ چیف آف ڈیفنس فورسز اور چیف آف آرمی اسٹاف فیلڈ مارشل سید عاصم منیر اور نائب وزیراعظم و وزیر خارجہ اسحاق ڈار بھی اس موقع پر موجود تھے۔
صدرِ امارات کو مسلح افواج کے دستے کی جانب سے 21 توپوں کی سلامی دی گئی۔ اماراتی خبر رساں ادارے وام کے مطابق ان کے ہمراہ اعلیٰ سطحی وفد بھی موجود تھا۔
دفتر خارجہ کے مطابق یہ دورہ پاکستان اور متحدہ عرب امارات کے درمیان تعلقات کے تمام پہلوؤں کا جائزہ لینے اور باہمی دلچسپی کے عالمی و علاقائی امور پر تبادلہ خیال کا اہم موقع تھا۔
دورے کے موقع پر اسلام آباد میں مقامی تعطیل کا اعلان کیا گیا، تاہم تمام ضروری خدمات معمول کے مطابق جاری رہیں۔
پاکستان اور متحدہ عرب امارات کے درمیان مضبوط سفارتی، معاشی اور ثقافتی تعلقات قائم ہیں۔ یو اے ای پاکستان کا اہم تجارتی شراکت دار اور ترسیلات زر کا بڑا ذریعہ ہے، جبکہ اپریل میں دونوں ممالک کے درمیان متعدد مفاہمتی یادداشتوں پر دستخط بھی کیے گئے تھے۔
