لاہور (ایم این این) — چیئرپرسن بینظیر انکم سپورٹ پروگرام (بی آئی ایس پی) سینیٹر روبینہ خالد نے اتوار کے روز بی آئی ایس پی سینٹرل زونل آفس پنجاب لاہور کا دورہ کیا، جہاں انہوں نے پریس کانفرنس کے دوران میڈیا کو پروگرام کی پیش رفت اور اہم اقدامات سے آگاہ کیا۔
میڈیا سے گفتگو کرتے ہوئے روبینہ خالد نے کہا کہ صدر مملکت آصف علی زرداری اور وزیراعظم شہباز شریف کی خصوصی ہدایات پر سوشل پروٹیکشن والٹ کا باقاعدہ اجرا کیا گیا ہے، جس کا مقصد ادائیگیوں میں شفافیت اور سہولت کو یقینی بنانا ہے۔
انہوں نے بتایا کہ بی آئی ایس پی کے تحت اس وقت ملک بھر میں ایک کروڑ مستحق خواتین کو مالی معاونت فراہم کی جا رہی ہے، جبکہ مفت سمز کی تقسیم کا تقریباً 50 فیصد عمل مکمل ہو چکا ہے۔
انہوں نے کہا کہ بی آئی ایس پی پاکستان کی تاریخ کا سب سے بڑا منصوبہ ہے جو خواتین کو سماجی تحفظ، ڈیجیٹل اور مالیاتی نظام میں شامل کرنے کے لیے شروع کیا گیا ہے۔
روبینہ خالد نے کہا کہ کل شہید محترمہ بینظیر بھٹو کی برسی ہے، جو جرات، حوصلے اور جدوجہد کی علامت ہیں، اور خواتین آج بھی ان کی جدوجہد سے حوصلہ حاصل کرتی ہیں۔ انہوں نے کہا کہ خواتین کے حقوق اور پاکستان کے لیے ان کی خدمات ناقابلِ فراموش اور عالمی سطح پر تسلیم شدہ ہیں۔
انہوں نے وضاحت کی کہ ڈیجیٹل والٹ کے ذریعے مالی امداد براہِ راست مستحق خواتین کے ڈیجیٹل والٹس میں منتقل کی جائے گی، جس سے دفاتر یا مراکز کے چکر لگانے کی ضرورت ختم ہو جائے گی۔ اسی مقصد کے لیے مستحق خواتین کو مفت سمز فراہم کی جا رہی ہیں۔
چیئرپرسن نے واضح کیا کہ یہ سمز بالکل مفت ہیں اور صرف بی آئی ایس پی دفاتر اور مراکز سے فراہم کی جا رہی ہیں، جبکہ ڈیجیٹل والٹس خود بی آئی ایس پی کا عملہ فعال کرتا ہے۔ انہوں نے زور دیا کہ کسی بھی بی آئی ایس پی اسکیم کے تحت کوئی فیس وصول نہیں کی جا رہی۔
انہوں نے خواتین کو ہدایت کی کہ ان سمز کو نقدی یا بٹوے کی طرح محفوظ رکھیں، کیونکہ آئندہ تمام ادائیگیاں انہی ڈیجیٹل والٹس کے ذریعے ہوں گی اور خواتین کہیں سے بھی اپنی رقم حاصل کر سکیں گی۔
انہوں نے بے روزگاری کو ایک بڑا قومی مسئلہ قرار دیتے ہوئے کہا کہ اس کے حل کے لیے بینظیر ہنرمند پروگرام شروع کیا گیا ہے تاکہ مستحق افراد کو ہنر سکھا کر خود کفیل بنایا جا سکے۔ اس موقع پر انہوں نے شہید بینظیر بھٹو کا قول دہرایا کہ “ہنر ہی آپ کا اصل اثاثہ ہے۔”
بعد ازاں روبینہ خالد نے لاہور میں ایل ڈی اے سبزہ زار، گورنمنٹ ہائی اسکول علی رضا آباد اور شالامار بھگوان پورہ میں قائم بی آئی ایس پی سم تقسیم مراکز کا دورہ کیا اور مفت سمز کی تقسیم کے عمل کا جائزہ لیا۔
انہوں نے عملے کو ہدایت کی کہ مستحق خواتین کو مکمل رہنمائی فراہم کی جائے اور خواتین کو مفت سمز کے حصول، استعمال اور حفاظت کے بارے میں خود بھی آگاہی دی۔
